گئجه
جعفر آروینی(تانیش)
گئجه‌نین باغرینی یاردی بیر گولله
رؤیاسی یاریدا قالدی بیر قیزین
یارینی گؤزله‌ین ایشقابدا آغ دون
ایتیردی هاراسان گئجه – گوندوزون
گئجه‌نین یاریسی یورغون آتانین
پوزدو یوخوسونو پوتونلار سسی
ساکیتجه اوزونو اونلارا وئردی
یوخودان اولماسین کؤرپه ببه‌سی
گئجه‌نین باغرینی یاردی بیر هارای
بیر ایشچی ایسته‌دی یوبانمیش پولون
پولیس کلفچه‌نی تاخدی قولونا
سالماغا تاپمادی او بیریسی قولون
گئجه‌نین یولوندا خسته بیر قادین
سئوداسیز ساتیبدیر روحسوز بدنین
بیر اوتاق بیر یاستیق بیر نئچه ارکک
آرخادا بیر اوشاق قوسور وطنین
گئجه‌نین سونوندا دلی بیر شاعیر
قلمین اوجوندان اؤزونو آسیر
شهرین اییلنمیش جندک قوخوسو
قاپالی قاپیدان ائوینه باسیر
