خزان
میرحسینقلی ریاحی فر(سیّد)
گونو باتدی یارپاقلارین
یئنه باغا باخدی خزان.
گؤزو دولدو یاشیل یازین
وار یوخونو یاخدی خزان.
گؤزل مئشه یاسا باتدی،
سالخیم سؤیود اؤرپک آتدی،
مورادا لوت یئرده چاتدی،
قورو چایدا آخدی خزان.
قارا قیشدان وئردی خبر،
شاختایا یول آچدی بَتر،
بورودو دام داشی کَدَر،
یوردا سونگو تاخدی خزان.
داغی دوزو توتدو دومان،
دوز دئمه‌دی ائله زامان،
یاخشی‌لاری ازدی یامان،
بیزی یامان سیخدی خزان.
دوشن یارپاق گلدی جانا،
سوردو اَسن یئل هر یانا،
«سیّد» قالدی یانا ـ یانا،
وار یوخونو یاخدی خزان.
