ارک قالاسی
بالاش آذراوغلو
یئنه دوشدون یادیما سن،
سو چیله‌دین عؤمرومه سن،
اؤزون سؤندور اودومو سن
ارک قالاسی!
بیتمیر اینتیظارین سنین،
اؤز یارامدیر یاران سنین،
دئ، ساغ قالدی هاران سنین
ارک قالاسی؟!
دومانلار دون بیچدی سنه،
زامان حسرت سئچدی سنه،
بو نه پایدی دوشدو سنه
ارک قالاسی؟!
بعضاً گولدون چیچک-چیچک،
شفقلردن آلدین مین رنگ،
بعضاً دیندین کؤورک-کؤورک
ارک قالاسی!
قالا دینمز، سنسه دیندین،
ائشیدین، من وارام، دئدین،
ارک آلدی نیدایا دؤندون
ارک قالاسی!
لئچکلندی نئچه نغمه‌م،
کؤرپه نغمه‌م، اینجه نغمه‌م،
اولایدی کؤنلونجه نغمه‌م
ارک قالاسی!
بو آیریلیق اؤتری‌دیر،
حسرتی ووصال اریدیر،
کؤنلوم اومید شهری‌دیر
ارک قالاسی!
سن تبریزین بالاسی‌سان،
سن ظفرلر چالاسی‌سان،
سن ابدی قالاسیسان
ارک قالاسی!
ارک قالاسی… !
۱۹۷۷
