نه‌دیر شعر؟
ستار گولمحمدی
گؤسترمز اؤزون هر یئته‌نه دؤولت دیدار
باغ ایچره گولون قدرینی هاردان دوشونر خار
جاهیل نه بیلر عالم معناده نه‌لر وار
دیل قانی‌دیر، گؤز نوری‌دیر، جان قیمتی‌دیر شعر
عاریفلر ایچین معنوی ائل ثروتی‌دیر شعر
حئکمت کیمی داییم آسیلار سؤز دلیگیندن
هر قلبه آچار بیر یئنی یول اینجه‌لیگیندن
داهی‌لره ده فئیض وئرر اؤز بیلیگیندن
هر عصرلرین یادداشی زنگین سسی‌دیر شعر
اؤلمز حیاتین دیلده گزن نغمه‌سی دیر شعر
بعضاً اوجالار ائلده نیظامی شکیلینده
ظولمت‌لره مئیدان اوخویار مشعل الینده
بعضاً دیل آچار دونیادا خاقانی دیلینده
حاقسیزلیق اولان اؤلکه‌ده یاس‌دیر آغی‌دیر شعر
ظولمون سیتمین باشینا نیفرت یاغی‌دیر شعر
بعضاً یووونار صاف سولارین زمزمه‌سینده
بعضاً دویولار داهی فیضولی نفسینده
بعضاً بوغولار عصرلرین دار قفسینده
حاققی سئون اینسانلارین اؤتگون دیلی‌دیر شعر
حسرتده یانان سئوگیلرین نیسگیلی‌دیر شعر
شیمشک کیمی شیدتلی‌دی، کسگین‌دی قیلیشدان
مئیداندا کئجر الده قضب سونگوسو داشدان
غفلتده یاتان میللتی جارلار هر اوباشدان
کئچمیش‌لرین اوسطوره‌سی‌دیر، هئیکلی‌دیر شعر
آزادلیغا حاققین اوزانان مرد الی‌دیر شعر
