شعرلر
بختیار علیمرادی(موغان اوغلو)
- نه وار کی؟!
چالیش بو دونیادان اینسانلیق آپار
آخماق یاشاماغا، یاشا نه وار کی؟!
دونیانین حیکمتین باشا دوشگینن
کال گلیب،کال گئدن باشا نه وار کی؟!
الدن توت دار گونده گره‌یین اولسون
یاخشیلیق ائتمه‌یه اوره‌یین اولسون
حالالدان بیر تیکه چؤره‌یین اولسون
حارامی نئیلرسن آشا نه وار کی؟!
الده قازانج اولماز مایا اولماسا
دلی گؤیه چیخار پایا اولماسا
کندین کاتداسیندا حایا اولماسا
چاشار آت اوینادار چاشا نه وار کی؟!
یارادیبدیر گوزل-گویچک یارادان
ساختا گوزللیک تئز گئدر آرادان
اصیلین چیرکینین آل تاپسان هارادان
سورمه‌لی کیپریگه قاشا نه وار کی؟!
«موغان اوغلو» حاققا اوجالسین سسین
منزیله چاتینجا ایشین اَیمه‌سین
گؤزله دوستون سنه داشی دیمه‌سین
دوشمانین آتدیغی داشا نه وار کی؟!
- عؤمرومون…
باخیشیم یولونا دویونله‌نیبدیر
الیندن تؤکولدو دنی عؤمرومون.
چکیلمیر یولونون دولایلاریندان-
دومانی عؤمرومون ،چنی عؤمرومون.
دلی‌لیک سئوگیمین باشیندا قالدی
آرزومون اللری قاشیندا قالدی
آیریلیق گؤزومون یاشیندا قالدی
آلدی اللریندن سنی عومرومون.
یاندیم بو داغلاردا، گؤزو نم اولدوم
عشقین بازاریندا باختی کم اولدوم
گاه له‌له‌یه دؤندوم، گاه کرم اولدوم
«موغان اوغلو» یاندی، دینی عؤمرومون.
۳٫ کرمی
عدالت قوپوز چال قویما آماندیر
گدیک‌لرده قارا باتا کرمی.
سوسما، کؤچون ساخلا قارا ملیکین
چالیش اصلی‌خانا چاتا کرمی.
اصلی‌نین کاروانی دوزولوب گئدیر
او، خومار گؤزلری سوزولوب گئدیر
باخ ، الی یاریندان اوزولوب گئدیر
قویما گئجه گوندوز یاتا کرمی.
یئنه ارزورومو توتوب قار بوران
گئدیر او داغلاری آشا بوکران.
آماندیر اوغولسوز قالار زیادخان
یول اوسته گؤزله‌یر آتا کرمی.
منیم ده وارلیغیم بو یولدا ایتر
اونلارا بو نالم هاراییم یئتر
چال عاشیق اصلی‌دن، کرم‌دن بتر
«موغان اوغلون» سالیر اوتا کرمی.
یک پاسخ
بختیار علی مرادی(موغان اوغلو) منیم عجب شئر ده عسکر لیک زامانیمین دوستو. بو گؤزل و دویغولو اینسان او زامان حیدر بابا دان ایلهام آلاراق “آی ساوالان” مجموعه سینی حاضیرلاماقدا ایدی. بختیارین شئعرینده صمیمییت، یولداشلیق، دوزلوک، اینسانلیق دالغالانیر. یازیقلار اولسون کی، ایندی رییه خسته لیک اوجوندان، ستارخان خیاوانیندا، رسول اکرم خسته خاناسیندا، درمان پروسئسینی کئچیریر. بو گؤزل شاعیریمیزه ساغلاملیق و آرتیق چاتیشقانلیلار دیله ییرم.