سنلی، سنسیز قیسا شعرلریم
آیمان
۱
دئییردین:
«اوره‌یی‌نین کندینی
یوز شهره ساتمارام!»…
یازیقلار اولسون
بیر داخمایا ساتدین!…
۲
آنام دعا ائدیب دئییردی
«خوشبخت اولسان قیزیم!»
سنین سؤزلرینی
آنامین دعالارینا
چوخ بنزتمیشدیم
نه بیلئیدیم
یالانلارین
آنامین ایچدن گلن دعالارینی دا
کسردن سالارمیش!…
۳
بیر عؤمور
قورویوب
سنی سئومک اوچون ساخلادیغیم
اوره‌یی سیندیردین!…
ساقین سینیقلاری،
الینی کسمه‌سین
قانلی ال ایله
سئوگیلرینین الینی سیخا بیلمزسن!…
۴
سؤیله دین صاباح…
آخی
سنین صاباحلارین
هئچ گون‌سایارلار دا
تاپیلماییر!…
۵
ایسته‌میرم
“من” یازام “سن” اوخویاسان!!…
سنین اوچون یازدیغیمی دا
بیلمه‌یینی ایسته‌میرم
من یالنیز…
بو یازیلارلا
اوره‌ییمی دینجلدیرم
خبرین اولسون!…
۶
حیاتدان بیر زاد دیله‌میرم
یالنیز
بیر”سن”
بیر”من”
بیر “دینج یئر”
اولسا یئتر!…
۷
هردن
بیر سؤزدن اوره‌گیم
ائله سینیرکی…
بوتون گوجوم توکنیر
یالنیز
سوسورام…
سوسدوقجا دا
سینیرام…
۸
منه سؤز وئرمیشدین:
«سنی اوزمه‌رم،
اوره‌گینین چیرپینماسینا ایزین وئرمه‌رم»
هئچ بیلیرسنمی؟
منی ترک ائتمگینله
اوزمک، اورک قیرماق دئییل
بوتون غرورمو،
روحومو سؤکوب داغیتدین!…
