ماوی گؤزلو سئرچه‌لرین گؤزونه…
سحر بارانی
قانچیل یارادیر یالان‌لارینین یئری
اورک دامارلاریمدا
لاختا باغلاییر باخیش‌لارین
کئچمه‌ییب کئچه‌سی دئییل…
سؤکوب آتماق وار بیر ده سنی
بوتون گونلرین گؤوده‌سیندن
دالدالانماق وار بیر ده
قارا گؤزلوک‌لرین کؤلگه‌سینده…
قیرمیزی ساچ‌لاریمین باشینا
قارا لئچک‌دیر آدین
گله‌جک‌دیر!
گله‌جک می گونلرین بیرینده دئمیشدی
فالچی قادین؟
خاطیرلاماق اولمور گؤزلرینین رنگینی
دنیزه دالمایینجا
بیر ده اورمان‌لار وار
همن دنیزلرین سینیریندا…
کئچه‌جک می بو یارا ایزلری پیچاق‌لاردان…؟
سیلینه‌جک می یوللارین سونو
خریطه‌لرین آلنیندان
گئری دؤنوشو اولسون دئییرم
هئچ اولماسا
بیر چیمدیک گؤزلریمه چکیم
سورمه کیمی
دؤنگه‌لی یوللاری…
دؤنمه ساقین!
برک اول
قاییتماغا مملکتین‌می وار؟
بوتون شعرلرین بوغازیندا
کور دویوندور آدین
نه هیچقیریق‌لا گئچیر
نه دنیزی قورتوم قورتوم باشیما چکسم!
اونداندیر پَلتَکلیی باخیش‌لاریمین
بیر آز دا ایسلاق‌دیر باغیشلار
گؤز-گؤزه گلدیییم یوواسیز دورنالار
ماوی گؤزلو سئرچه‌لرین گؤزونه تاخیلیر هردن
قونور تئلفون تئل‌لرینه
سس‌لری سسینه بنزه‌ین
هامی کیشی‌لرین دوداغی‌دیر
داغی‌دیر
چکیلیر سینمه
تکرار- تکرار
بیر گونلوک
بیر گئجه‌لیک
آغ گئجه‌لیک‌لی گلینه بنزه‌ییرم
دوواغی ساچ‌لاریندا پیرتلاشیق
بزه‌یی دوزه‌یی آینالاردان آسیلیر
و گئجه کؤهنه ساققیزدیر داریخدیغیندا
چئینه‌دیکجه اوزانیر
دیل دوداغینا یاپیشیر
سومورور-سومورور
ساچ‌لارینداکی قارانقوش‌لاری
سولور سارالیر
هر اویاندیغیندا
آریخلاییر بیر آز داها
ریه‌لرینه گئتمک ایسته‌ین هاوالاردا …
گؤردویون دئییل من آرتیق
سینیرلاریم
سوموک‌لرین
دری‌لرین آیییرد ائتدییی بویوت‌لار دئییل،
قوخونا بورونن
بوتون جغرافیا اؤته‌سی خریطه‌لردیر
سینیرلاندیغیم یاشام
دارالیر زامان اؤتدوکجه
قالاسی دئییل باهالی اودکُلن قوخولاری دا
آزالدیقجا آزالیرام
خیردالانیر
یئله گئدیرم آچیلینجا پنجره‌لری
بو داریسقال
گولوش‌لرینه یوخسول اوتاق‌لارین…
یک پاسخ
بیزیم تورک دیلینده یازان شاعیرلریمیز هامیسی چوخ دیرلی اینسانلاردیلار،،من اؤز نوبم‌ده هامیسینین الیندن اؤپرم نیه کی آنا دیلیمیزه داها چوخ گوج قاتیللار