کرمی!
ح. هریزلی
یورغون خیالیمی یئنه بیر کره
نغمه قانادینا میندیر کرمی!
دولاندیر داغ به داغ، دره به دره
اصلیم دیارینا اندیر کرمی!
آرزیم دوستاق اولوب بدن ایچینده
قورخورام چورویه کفن ایچینده
سرحد اسیری‌یم وطن ایچینده
شیغا، سرحدلری سیندیر کرمی!
هارای، هارای چکدیم هایا گلن یوخ
آغلادیم گؤزومون یاشین سیلن یوخ
سئودالی کؤنلومون دیلین بیلن یوخ
دیندیر اوره‌ییمی دیندیرکرمی!
چکمیشم چکه‌رم وطن قئیرتی
بو یولدا خوشلارام هر مصیبتی
آجینی، آغرینی، دردی، حسرتی
سیزلا جانیمیزا سیندیر کرمی!
عشقین آتشینه من وورولموشام
یانارام اودونا هرسحر آخشام
سنین اوجاغیندا یانماقلا خوشام
یاندیر «هریزلی»نی یاندیر کرمی!
