بیر اوره‌ک وطن
ائلدار موغانلی
ندن‌دی گؤزلرینین گوزگوسونده چن گؤرونور؟
بولودلومو اوره‌یین، یوخسا چن ندن گؤرونور؟
یاناقلاریندا سولوب شعریمین قیزیل چیچه‌یی
بنؤوشه بنده دوشوب‌می کی یاسمن گؤرونور؟
جوموبدو دالغالارین قوینونا بولود لپه‌لر
دنیزله فیرتینا چاخناشمادا نه تن گؤرونور!
چیچک- چیچک آچیلیر گؤزلرینده میرواری‌لار
قه‌هر یاغیر نئجه‌ده داملا- داملا دن گؤرونور!
پاییزلاییب سینه‌ن اوستونده ایلک باهار هوه‌سی
قارانقوش آرزولو رؤیالارین پرن گؤرونور.
داغیلدی کؤنلوم ائوینده ایشیق بینؤره‌لری
گؤرنده گؤزلرینین گوزگوسونده چن گؤرونور.
یئنه گونشلیگه اوچ قوی باخیشلارین آچسین
سیخیلما، قونماغینا بیر اوره‌ک وطن گؤرونور.
آبان ۹۴- تهران
2 پاسخ
ائلدار موعللیمین غزلینی سئودیم. شئعرین میصرالاری نین باشدان – اته یه ایلگیسی بیر یاندان، بیر یاندان دا باخیش چئوره لری دارالان یولداشلاری، اومودا و ایشیق یوردونا چاغیرماسی، اونون اوره ییمجه اولان دونیا گؤروشونو سرگی یه قویور. باخیشلار فرقلی اولا بیلر آنجاق منجه شئعرین شاه بئیتی بو دور: پاییزلاییب سینه‌ن اوستونده ایلک باهار هوه‌سی
قارانقوش آرزولو رؤیالارین پرن گؤرونور. ساغ اولسون ائلدار موعللیم
سلام حورمتلی ائلدار معللیم. بو سایاق گوجلو غزللره راستلاشاندا اینسان جوانلاشیر . بیرکیتاب آغ شعرین اینجه لیگی بوردا وار. اللریزه , اوره ییزه ساغلیق .