کابابخانادا
کیان خیاو

بو قارسون چوخ یوباندی
ایکی شیش کاباب نه‌دیر کی؟
گونون گون اورتا چاغی ایکی تامامدا
زامان بیزدن قولای- قولای سوووشور
و گونش
بو گون دیکئی- دیکئی شاخیر تبریزه!
یادیندامی؟
سون دؤنه من ائوینیزدن چیخاندا
هاوا قارانلیقلاشمیشدی.
گؤرمه‌دیم ده
او ماوی شال سنه نئجه یاراشدی!
و ایندی ایکی ساریمساق، ایکی بیبر
منیمله بیرگه اوتورموش سنی دوشونورلر
سن اولماسایدین ایندییه دؤردونو ده یئمیشدیم.
غریبه‌دیر
ایچیمده باشقا بیر بؤیوک ایستک ده وار
چوخ ایستردیم
دالیمداکی ماسا باشیندا اوتوران عاییله
آرد- آراسی کسیلمه‌دن دئییب- دانیشیب- گولسونلر!
دوروم گئدیم
سن کی ایلکینیندن یوخسان
باشین باشقاسینا قالدیر هر زامان
قارسون دا کی چوخ یوباندی.
گونون گون اورتا چاغی ایکی تامامدا
اینسانین آغلاماغی دا گلمیر!…