دوداقـلاریم کورسو
معصوم جبارپور
نار دنه‌له‌ییرم
بیر دامجی یاش
بیر دامجی قان
نار دنه‌له‌ییرم!
گئجه‌نین چیینینه دایانیب خاطیره‌لریم
دئنن:
گئجه‌نین هاراسینداسان؟
باخسانا
بوداق‌لار سویوغون قامچیسی آلتیندا آه چکینجه
اینله‌ییر-
بیر قیزین اینجه‌لییی
گؤوده‌سینین آغریلیغیندان!
عسگر پالتارلاریندان دامجی- دامجی سو آخیر
ایسینمک جینین بوروسوندان گولومسه‌ییر
آغزی ایری جیب‌لری
حسرت‌لر آنانین کورسوسونون آلوووندا یانیر
دوداقلاریم کورسو
کؤمورلرین اوزو قارالیر
بیلیرسن می:
ـ کؤرپه‌لرین دومسوک‌له‌مه‌سی کیمی سئویرم سنی!
آنجاق
گون باتان چاغی
قونشونون قیزی تامسینا ـ تامیسنا دئییردی:
تورک ائرکه‌یی‌نین اوره‌یینی
قارا گیله‌لر سونقوموش هر آن!
اوره‌کده سئوگی بیتیکلری
ایستر-ایسته‌مز اؤلوشگه‌ییر
سوموک‌لر اینله‌ییر
دوداقلاریم اود توتور
چن باسیر اوره‌ییمی
یئنه تالواسا
تالواسالار یالان سؤیله‌مزلر
بیر سس اوره‌ییمین دهلیزیندن هایقیریر
یازیق یاشیل گؤزلر
بیر جوت قارا گؤزه قوربان گئتدی
کدرلری سومورور کؤکسومدن
ساریلیر ایکی نفس
ساغلیق وئریر گؤزلریم
سئویشمه، نه یئر نه ده یورد تانییار!
نه ده زامان ایله تانریلاشار!
بلکه آرخامیزدا کی کوچه
یوخسا
باغچامیزین قوجا بارسیز آغاجی
ائله بو آنین کورسوسو بئله_
آنانین جاهاز یورقانی دیکسینیر اولایلاردان
چیلقینجاسینا سؤکور هؤروکلو ساچلارینی
سئوگیمیز، یئنی بیر پروتئستو
کؤک سالیر بوش اوتاقدا
اینله‌مکدن پنجره‌لر باغیریر
ایکی-اوچ دامجی شهید دامیر
سوسقونلوغومدا مین‌لر هارای
هارای سسیمه قارپیزلارین قیرمیزی بویاسی قاچیر
قونشونون قیزی قاپی چرچیوه‌سینده
ماوی گؤزلرینده یئددی گؤی دوغولور
گولور
نه گؤزلدیر اوشاقلیق چاغلاری
الینده کی نار دوشور
پارچالانیر
نئچه دامجی قان سیچراییر
کورسونون یاساق بوجاغینا
چیلله گئجه‌سی
قان تؤکوب قان وئره‌ریک
بو گئجه آغ‌آپ‌آق اورک‌لرین قانین تؤکورم
گل
دیدرگین‌لیک‌لریمی شاختایا وئریم
بیلیرسن‌می؟
ایللردی دینجلتمیش وارلیغین منی
یاشامین سیمگه‌سی سن
سیلینیمیرسن
قازیلیب وارلیغین آغ قابیغیمدا
بیر دامجی یاش
بیر دامجی قان
نار دنه‌له‌ییرم!
