ای مقدس مسکنیم، ای شانلی آذربایجان!
بیز سنینله فخر قیللیق یئر اوزونده هر زامان.
قوی وار اولسون ای وطن، اصلان صفت اوغلانلارین!
اؤپسون آلنیندان آنا! اونلار سنین، سن اونلارین.
***
حریم بزم عشرتده یئنه جانانه‌لر اوینار
گول اوسته ناز ایلن گویا قونوب پروانه‌لر اوینار
ووراندا اللرین دلبر او زولف عنبر افشانه
گلر خرمن کیمی موجه تئلینده شانه‌لر اوینار
گلنده چرخه ناز ایله سالار بو چرخی گردیشدن
تزلزل ائیلر عالم‌لر بت و بتخانه‌لر اوینار
ائدنده تئل‌لرین افشان دؤنر باغریم قیزیل قانه
دیلیم عاجزدی شرحیندن دئسین آیا نه‌لر اوینار؟
وئرردیم جان بی روحه او بزم ایچره اولان عالم
زمین اوینار، زامان اوینار، او دم کاشانه‌لر اوینار
اولا ساقی اگر دلبر اولار فرزانه‌لر مدهوش
آتار عقلی باشیندان اورداکی فرزانه‌لر اوینار
قیرار زنجیر عشقه باغلانان دیوانه‌لر قئیدین
گلر شوره بوتون مجلیسده کی دیوانه‌لر اوینار
دانار ایمان و دینین سیندیرار پیمانینی زاهد
او محفل ده کی ساقی مئی وئرر پیمانه‌لر اوینار
سمیرا حالتین گورسه آتار حور ایله غلمانی
چیخار اورادی یاددان سبحه‌سینده دانه‌لر اوینار
دولاندیرسا او شهلا گؤزلرین میخانه‌لر باغلار
محبت باده‌سیندن مست اولان مستانه‌لر اوینار
آتار قئیدین پوزارسان منلیین مرزین گلر شوره
گؤرنده آشنالر سهل‌دیر بیگانه‌لر اوینار
گلر شوریده بولبوللر نوایه صحن گولشنده
گول اوینار ،بولبول اوینار شوقیدن گولخانه‌لر اوینار
نئجه مفتون اولان کؤنلوم توتار آرام اگر گؤرسه
او مجلیسده کی قالخار گؤزلری فتانه‌لر اوینار
گؤرر شوریده “ایتگین” بزم عشرتده اولان حالی
گلر شوره یازار طبعینده کی افسانه‌لر اوینار
