اونلار …
اسماعیل خرمی

اونلارین-
آغیزلاریندان سو،
اللریندن چؤرک،
گؤزلریندن اومود
و توفنگلریندن-
باهار فیشقیراردی.
بئللرینده بیر دونیانین یوکو اولسادا،
قوش کیمی اوچاردیلار،
ایچین یاراردیلار-
چوروموش یئللرین ایچینده‌کیلری.
باشلاری اوره‌کلرینده‌یدی،
و اوره‌کلری آیاقلاریندا.
کؤنول چکن یئرده –
أیاقلاری قاباقلارینا قاتیب-
یول گئدردیلر.
ائولری هارایلارین
ائرکن چاغی،
یوخولاری درین دوشونجه‌لرین قوجاقی‌یدی.
اونلارین آیاقلاریندا دوداق ایزی یوخیدی.
گلدیلر،
ساری گونلری آیاقلارینین آلتیندا اریتدیلر.
گئتدیلر،
سایریشان گوزگو قاباقیندا سارالمادان.