آذان سسی
انصار قره‌داغی
بو آذان ، حضرتی بودا نَفَسی، دین سسی‌دیر
سؤیله سس‌لر کَرمی بیر نئجه شرقین سسی‌دیر!
شهری آشوبه چکیب گؤزلری، یاد بیر گلینین
بئله نقّاشی، قلم، قانلی اوفوق چین سسی‌دیر!
گونشین صوبحی قیامت، سحَری سجده، قیام
دَردی، دریاسی، بوغولموش سسی مؤمن سسی‌دیر!
خلقی زینداندا قیلیب لاپ ده‌لی یوسیف غزلی
جان زولیخاسی سئوین، ناله‌لر آمین سسی‌دیر!
یول وئرین، اسکی کیلیسالاری یاندیرمالییام
گنج مسیحا سسی بیلمه‌م نئجه دوشگون سسی‌دیر!
قیبله ـ قیبله داغیدین سقفی آچیق کعبه‌لری
بو آذانین، بو نامازین حَرَمی گون سسی‌دیر!
بو سس، آللاه، نه وئران قیلمادا یار قیبله‌لرین
ذیل ـ بَمیندن بئله معلوم کی او مجنون سسی‌دیر!
لا الاهه ـ دئیه، مین یول یاهالیب لئیلی دئدی
لئیلی ـ لئیلی سسی، زنگوله‌سی یاسین سسی‌دیر!
سوره‌لر سئحریدیر «انصار» غزلی کوفره چکن
بو نَوا، ناله، بو نئی ویس یله رامین سسی‌دیر!
۱۳۹۳/۴/۲۸
