«تایسیز سئوگی» کیتابیندان شعرلر
میهن کریمی(گونش)
یاساق سئوگی…
ای منی گؤزدن آتان، گؤزلره قوربان دئمیشم
بیر دؤنوب باخماغینا مین کره جان- جان دئمیشم
اینجییب، اینجیده‌نیم، هئچ زادا مندن کوسه‌نیم!
سندن اؤزگه دئه کیمه، کؤنلوم ائوین یان دئمیشم؟
منی گؤرجک گؤزه‌لیم، گول اوزونو دالدالادین
شوبهه‌لندیم اؤزومه بلکه ده بؤهتان دئمیشم
سن اوساندیقجا گؤزومدن، زامان آندیردی منه،
منده هر درد اولورسا اونو آسان دئمیشم
قادینا سئوگی یاساق، عشق قوروق، ایستک اوزاق
قادینی عشقی اوچون تاپدانان انسان دئمیشم.
اینله ییر…
یولدا قالمیش گؤزلریم ایللردی سنسیز اینله‌ییر
سؤیله‌سین دردین سنه درد اوسته دردین چینله‌ییر
انتظاردان باشقا وار؟ حسرت گؤزون حس‌ین یوران
انتظاریندیر گولوم، شن قلبیمه غم تیلله‌ییر
چوخ زاماندیر آیریلیق جاندان سالیبدیر قلبیمی
آیریلیقدان آیریلیق یوخسا بیزی اوستونله‌ییر؟
سیزلادیم احوالیما گؤیده بولودلار تؤکدو یاش
سندن اؤزگه هر نه وار بیر- بیر بو دردیم دینله‌ییر
من جاوانلیق گنجینی، بیر عهده قوربان ائیله‌دیم
واختدان اول عؤمرومو، آرتیق اؤلومدور اؤنله‌ییر
قاییداجاقسان…
گئدنده باخیشین گلرم، دئدی
دردینی هارداسام دیلرم، دئدی
آیری یاشامارام اؤلرم دئدی
بیلیرم سن منه قاییداجاقسان.
گئدنده سون ویداع دئمه‌دیم سنه
قاییدار هر کوسن بولبول چمنه
قوووشار هارداسا سئوه‌ن سئوه‌نه
بیلیرم سن منه قاییداجاقسان.
حیسسیمدن عشقینین اودو سؤنمه‌ییب
گؤزومده ایز سالان اوزون دؤنمه‌ییب
اورک چمنینه یاد قوش قونماییب
بیلیرم سن منه قاییداجاقسان.
باخیشین گؤتورموش حیسسیمدن یاشماق
عریان حیسلریمه اولوبدور بویاق
بیر زامان گؤزومدن دوشسن ده اوزاق
بیلیرم سن منه قاییداجاقسان.
الینین ایستیسی اللریمده‌دیر
نیشانا شاناسی تئللریمده‌دیر
بیرینجی باخیشین ایللریمله‌دیر
بیلیرم سن منه قاییداجاقسان.
سؤز دئمه‌‌میشم…
نه دئدین باش اوسته دئمیشم گولوم
سؤزونون اوستونه سؤز دئمه‌‌میشم.
سنی قارغامایا گلمه‌‌ییب دیلیم
سؤزونون اوستونه سؤز دئمه‌‌میشم.
اویاقلیق منیمچون اولوبدور پئشه
گئجه چاتدیرمیشام آیی گونشه
وورموسان هیجرینله قلبیمه تئشه
سؤزونون اوستونه سؤز دئمه‌‌میشم.
عشقیمدن اؤن توتدون قارا هوسین
سیزلادیم اوجالتدین آجیلی سسین
یاسلادین آرزیسین بو من بی کسین
سؤزونون اوستونه سؤز دئمه‌‌میشم.
دوستا، نامحرمه یوزمین نامرده
آچمیسان سیرریمی سالمیسان درده
قونوب اوره‌‌ییمه غم پرده- پرده
سؤزونون اوستونه سؤز دئمه‌‌میشم.
گؤزلرین یالانین دوزونو دئییب
هر گون باخیشلارین بیر یانا اه‌‌ییب
تاماهین گؤزللر گؤزونه ائییب
سؤزونون اوستونه سؤز دئمه‌‌میشم.
ایندی ده اغیاری چکیرسن گؤزه
سیزلارام سیرریمی شعیره، سؤزه
“گونش”م بیر جفان چکمه‌‌دیم اوزه
سؤزونون اوستونه سؤز دئمه‌‌میشم.
