(۱)
آغاج
تورپاغین قوجاغیندا اینله‌ییر
یوخوسونو کولک اوغورلادیغی اوچون؛
پنجره
یاغیشی آغلاییر
گؤی سیرداشی دومانلی اولدوغو اوچون؛
سن
هاراسینداسان بو فیرتینانین؟
من
حسرت کؤینه‌یی تیکیرم سنه
ائوین آرخا اوتاغیندا.
(۲)
نه اولسون کی بیر ائو قارانلیق اولدو
باشقالارینین ائوی کی ایشیقدیر
آنجاق
اوره‌ییم توتولدو
وحشی بیر قوش کیمی قانادلانیب گئتدیگینده.
من قالدیم
و کدرله دولو بیر یووا
و دئییلمه‌میش ناغیللار.
(۳)
پنجره‌دن باخیرام سنه
حیات گولومسه‌ییر منه
باخیشین گوزه‌لدیر
رقصین گوزه‌ل
پنجره ده گوزه‌لدیر.
سن؟
هامیدان گؤزه‌لسن
اؤزوسن گولوشون،
اؤزوسن رقصین
و اؤزوسن حیاتین.
(۴)
گئجه‌نی سئویرم
او آن کی سن-
مینلر اولدوز آراسیندان
گوموشلندیریرسن چؤلو، باییری.
و من
دالغاسیز دنیز کیمی-
سنی گؤزله‌ییرم
مینلر ایشیقلی شام آراسیندان.
یک پاسخ
هئچ بیلمیرم
بیر بئله آدامین ایچینده
سنه نییه ساریلمیشام.
بلکه
یالنیز سنینله کپنک اولورام!
چوخ گؤزل شعر اعلا چئویری اوغورلار اولسون