میانانین سئویملی شاعری «ارشد نظری(توغای)» عزیزلندی

میانا شهرینده فعالیت گؤسترن «چنلی تئل» ادبی درنه‌یی‌نین قوروجولاریندان اولان سئویملی شاعریمیز «ارشد نظری(توغای)» اوچون خرداد آیی‌نین ۲۱ینده چوخ طنطنه‌لی عزیزله‌مه مراسیمی کئچیریلدی.
میانا شهرینین ادبی جمعیتی طرفیندن قورولان بو طنطنه‌لی مراسیمده میانا و آذربایجانین مختلف شهرلریندن ادبیات و اینجه‌صنعت هوسکارلاریلا برابر آذربایجان ادبی مدنی شخصیتلری‌ده اشتراک ائتمیشدیر. شاعرین دوغما یوردو میانادا تشکیل ائدیلن بو مراسیمین باشلانیش زامانی سون واختلار حیاتینی ایتیرمیش گؤرکملی زنجانلی شاعر اوستاد عباس بابایی‌نین عزیز خاطیره‌سینه بیر دقیقه‌لیک سکوت اعلان ائدیلمیشدیر. سونرا، سئویملی شاعریمیز حقینده شعرلر و یارادیجیلیغی باره‌ده ادبی تنقیدی مقاله‌لر اوخونموش و اونودولماز بیر موسیقی آخشامی کئچیریلمیشدیر.
مراسیم میانا «چنلی تئل» ادبی درنه‌یی‌نین قوروجولاریندان اولان شاعر «سعید قافلان»ین دانیشیغی‌ایله آچیلمیش، سونرا تهراندان مجلیسده اشتراک ائده‌ن آذربایجانین گؤرکملی شاعر و اجتماعی شخصیتی «حبیب فرشباف» ارشد نظری حقینده اوره‌ک سؤزلرینی مجلیس اشتراکچیلارینا چاتدیرمیش و بو شهرین ادبیاتی انکشافیندا خیدمتلری اولان شاعر میانالی علیرضا  و عزیز سلامی‌دن یاد ائتمیشدیر.
دؤرد ساعات سورن بو ادبی مدنی ییغینجاقدا تبریزدن: سلیمان ثالث، ناصر داوران، میرعلی سیدسلامت؛ میانادان: سعید قافلان، محمد پویان، علیزاده، شهناز صالحی(باهار)، حسین رزمی، صابر لطفی(بوزقوش)؛ خلخال‌دان: بهبود مرادی؛ زنجان‌دان: آی‌لار موسیقی گروهو، ثریا بخشی(آیلار)، عاشیق عباس ستاری، یئنی‌یئتمه صنعتکار سعید ستاری، خواننده احمد میرزایی، عبدالله مرادی(بالاش زنگانلی)، محمدرضا باغبان کریمی، پرویز سودی(دالغا)، فرجی، خواننده بهبود نظری افشار، علیمحمد بیانی، زنجان قیزیل اؤزن ادبی انجومنی‌نین نماینده‌سی، اصلان بابایی، آراز، ساز ایفاچیسی منوچهر نجفی، ارسلان ایمانی، اکبر آقایی؛ سولدوزدان: سحر بارانی؛ ارومیه‌دن: کاتیب‌اوغلو؛ موغان‌دان: ائلمان موغانلی و تهران‌دان: حبیب فرشباف، حسن ایلدیریم و ائلدار موغانلی چیخیش ائتمیشدیلر.
بو مراسیمین الیمیزه چاتان شکیل‌لرینی ایشیق اوخوجولارینا تقدیم ائدیریک: