آذربایجان
حیدر عبادی
بیر قوجاق تبریز باغلادیم،
بیر دنیز اورمو؛
بیر ساوالان خیاو گؤتوردوم،
بیر سهند اردبیل – شورابیل؛
بیر گونه‌باخان خوی باخدیم،
بیر مزار شمس؛
علیصدر درینلیگی بویدا همدان آغلادیم،
سینه‌می داغلادیم
و اوجالدیم
سولطانیه گونبزی – زنگان؛
عشق ائله بورادان باشلادی،
اوره ک دویونتوسو بورادان؛
و سوزولدو گؤزلریمدن بیر وطن
آذربایجان!
اؤنونده آیاغا قالخدیم،
حؤرمتینه پاپاغیمی گؤتوردوم
و چنه‌م سینه‌مه دایاندی،
جانیمدا قازیلدی بیر جان
وطن آذربایجان؛
آذربایجان!
