آنجاق قادین…
کیان خیاو
آدینی مانیفئست توخوما بئینیمه
من اورک آدامییام
بیر گؤروشده تانییارام
نئجه کؤکلو- کؤکنلی
نئجه دویغو تانریچاسی اولدوغونو!…
بارماقلارینی فئمینیست سوخما گؤزومه
اؤزونو دوبوارین ایکینجی جینسینه
منی ده نیچه‌نین قامچیسینا باغلاما!
نه سؤمورمک
نه ده سؤمورولمک
بیر باشا سئومک، سئویلمک بیزیمکیسی!…
آغاجسانمی؟
آلما دئییل، اوزوم دئییل
اؤزونو اییده آغاجی اوستون توت!
آدامسانمی؟
نه آتئنا، نه ده بایبئجان قیزی
شیلتاق بیر قیز اوشاغی قولایجاسینا!….
باخ، من اوشاقسی یازیرام سنی
و سن
اوشاقلیق
الیمه دوشمزسن.
سنین نه چیلغینلیغین بللی
نه ده یوموشاجیقلیغین.
اویسا من سنی ایلک دؤنه گؤرنده
اوشاق اولسایدیم
آنامین الیندن بئله بوشلانیب قاچاردیم!….
من یاشامین دادینی آلدیرما‌دان
گوج- بلایلا یاشاییرام سنسیز
اوستونده ایسرافا اوغرامادیغیم
یالنیز سنین آدینا تؤکولموش میصراعلار…
گؤزل دئییل
اؤزگور بیر تانریچا دئییل
سنین یالنیز بیر آدین وار:
قادین!
سنین نئجه ده‌یرلی اولدوغونا
منیم اوچون بو یئتر:
آنام بیر قادین ایدی
باجیم بیر قادین
نازلیجا قیزیم بیر قادین اولا‌جاق
و سن سئوگیلیم قادینسان
اینسانلیقدان کؤنول آلما اوستاسی!…
کیمسن، نه‌سن، بیلمیرم
آنجاق آدین
آمازون دالقا‌لارینی کؤپوردن هیپولیته‌سه
و اللرین
آپولینئری دونیایا باغیشلایان آنجئلیکا‌سا
بویور، سنی سئویرم!
سنی
گولوشلریندن دویمایان گؤزلریم
اؤپوشلریندن دویمایان دوداغیم
دویمایان اللریمله، رؤیالاریملا
و آدینین هارمونیسیندن ریتم آلان
بوتون اورقانلاریملا
بیر اینسان سئویرم دئمک
بیر قادین دئییل
بیر اینسان!….
۱۲/ ۱۲/ ۱۳۹۱ (۲ / ۳ / ۲۰۱۳)
2 پاسخ
دوغروسو بو آچیقلامالاری شعر آدینا ادبیاتیمیزا یئدیرتمک دوغرومو؟شعر اولایی بو یازی نین هاراسیندا باش وئرمیش؟دیل ساده نثر دیلی.شاعیرین ده تحکمی متنین باشاباشیندا قاباریق اولاراق گوز چیخاریر
چوخ گؤزل ایدی؛ یاشاسین اوستاد کیان خیاو؛ نه یاخشی کی بئلنچی اوستا شاعیرلریمیز ده وار.