ایکی قوشما
میرحسین ریاحی‌فر (سیّد)
(۱) دردیمی
دلی عاشیق گتیر دیله سازینی
تاپشیر کولک یایسین ائله دردیمی.
کؤکسومه چکیلیب داغلار حسابسیز
اونودان دئییلم بئله دردیمی.
آذرده دوغراندی یاشیل بوداقلار
قیزیل لاله اولدو چیلغین قوچاقلار
هارای قوپاردیلار آلما یاناقلار
سونالار یازدیلار گؤله دردیمی.
قیشی گتیردیلر دوندو اوره‌ییم
قیزمار گونه حسرت قالدی چیچه‌ییم
زول ـ زول اولدو قابیق قویدو کوره‌ییم
اؤلسم ده قویمارام اؤله دردیمی.
یوخدور یارام کیمی یارا دونیادا
نسیمی‌لر گئدیر دارا دونیادا
سن دئ چوبان قارداش، قارا دونیادا
چالسین توتک، سالسین دیله دردیمی.
اوجاقدا هله وار کؤزوم آی عاشیق
آزادلیغا قوربان اؤزوم آی عاشیق
«سیّد»م وار بیرجه سؤزوم آی عاشیق
تاپشیر کولک یایسین ائله دردیمی.
(۲) قارانقوش
صمد بهرنگی‌نین خاطیره‌سینه
یووالی قارانقوش کؤچسن ده بوردان
اونوتماز یاز سویلو بو ائللر سنی.
قیرمیزی گولودون داغلاردا بیتمیش
دنیزه آپاردی گور سئللر سنی.
سندن سورا یاشیل تاغلاریم سولدو
سؤیودلر یاس آچیب تئللرین یولدو
گؤزلر بولاق اولوب اوره‌کلر دولدو
یاشیل باشلیم گؤزلر بو گؤللر سنی.
قاییتسان سارماشیق بوینان قول هؤرر
لاله‌لر یانیندا بیرده گون گؤرر
بولاقلار چیینینده یارپیزلار تؤرر
قوجاغینا باسار گؤی اللر سنی.
نئجه بو ایللری عؤموردن ساییم
سنسیز نه باهاریم، سنسیز نه یاییم
سنسیز آغلار قالیب اولدوزوم آییم
نئجه آلدی بیزدن او ایللر سنی.
یارالی قارتالی سار آلیر ایندی
یایدا باشیمیزی قار آلیر ایندی
گئن دونیا «سیّد»ه دارالیر ایندی
دار اوسته هارایلیر آل دیللر سنی.
