یاساق شعریم
وحید فروتن

شعرلر ایندی آغاریرکن
آغ‌ایمیش اوزو آغ شعریم.
ده‌ییشدیکجه بو گون صاباح
دون کی اولور بو چاغ شعریم.

او ایستکلرین زیروه سی
سئونلرین بنؤوشه سی
بیر آنانین بالا سسی
هیجرانلارا سوراق شعریم.

بوی آتیبدیر سینا – سینا
اییلمه‌ییب سیندیرانا
کاسیب آتا بالاسینا
یاندیردیغی چیراق شعریم.

هر اورکده مین آرزو وار
هر آرزو بیر شئی آرزولار
شهید اولدوقجا آرزولار
دوغار واراق- واراق شعریم.

آیری دوشدوک قان قارداشی
گؤیردی اومیدین داشی
قاراباغدا قان یادداشی،
قاراداغدا بوزاق شعریم.

دونیانین سؤنمز ایشیغی
تانرینین وئرن اوشاغی
توی گونو توی یاراشیغی
دؤیوش گونو یاراق شعریم.

ائل بؤلونوب سؤز بؤلونوب
میضراب سینیب، ساز بؤلونوب
بیر آلدانیب یوز بؤلونوب
تاریخ بویو اویاق شعریم.

زاماندانمی چوخ اوزولدو؟
شوکور دیرچلدی، دیریلدی
اؤزو دیلچی، اؤزو دیل‌دی
یاساق شعریم، یاساق شعریم…
۱۳۹۱