سن و آی
علی جوادپور

اوره‌یینی بیر ایلیق روزگار تیترتسه
گئجه آیی سئودییی‌نین بیرینه
و اونون گؤزونه اوخشادا بیلرسن!
ایچه‌رینده بیر حئیرت اویانسا
گؤیده آیی
تانری‌نین بارماق ایزینه اوخشادا بیلرسن!
کایناتا قول چکیب
بارماق باسیب دئیرسن؛
گوندوز گونش‌ایله گئجه آی‌ایله!
ایللرین آجلیغین چکسن
اونو اَته‌یی اونلو بیر قادین کیمی گؤررسن ـ
چؤرک توزونا اوخشادا بیلرسن!
دیللرین حسرتین چکسن
اونو تورکوسو دوستاق بیر سینیق اوزان قوپوزونا
اوخشادا بیلرسن!
بونلار هامیسی اوخشاتمادیر
و آی ائله آی‌دیر
ایشیغیندا بیرآز گونش دادی وار
چئوره‌سینده گونش کؤلگه‌سی، گئجه فریادی!…

بو اوخشاتمالار
باشینی قاتار دوستوم؛
اوره‌یی ایلیق روزگارلی
ایچه‌ریسی حئیرتلی
قارنی آج
دیلی دوستاق
یوخو توتار آپارار سنی بیر اوغرو کیمی!
یاتارسان عؤمرونون بیر گئجه‌سین‌ده
بئله‌جه یوخولار زیندانیندا!
سحر آییلارسان قوشلارین سسینه
جانیندا بیر اود
گؤی‌ده سحره قالمیش آیی گؤررسن
سولموش آیی گؤررسن
و اونا شعیر سؤیله‌یرسن:
سنین اوزونو آغ ائیله‌ین گئجه‌یمیش دئمه؛
آی گؤیون سونسوز ماوی‌لییینده
سحره قالمیش سولغون آی!
۱۳۸۴