ساوالان
اکبر رضایی

ساوالان اولماسا گر، اؤلکه میز آسوده یاتانماز؛
دره لرده دولانانلار،
تپه‌لرده گزیشنلر ائوه آسوده چاتانماز.
ساوالان اولماسا خالقین هایی چیخماز،
سَسی باتمیشلارا بنزر.
…
ساوالان های‌لارا های‌دیر،
ساوالان بای‌لارا بای‌دیر،
ساوالان گورلو هارای‌دیر،
ساوالان سیرلی سارای‌دیر،
ساوالاندیر یاپیشیب خالقین الیندن چَکیر آیدینلیغا ساری،
اونو آرخام بیلیرم، بیل بونو باری…!
ساوالاندان بوی آتیر غئیرت آغاج،
اونو کیم دویماسا یوخدور دا علاجی.
…
ساوالاندیر ائلیمین باشدا دایاغی،
ساوالاندیر دیلیمین باشدان آیاغی،
ساوالاندیر منه یولداش، سنه قارداش،
ساوالاندیر منه سیرداش، سنه یولداش،
ساوالاندیر منه قارداش سنه سیرداش،
ساوالاندیر منیم ایلهامیما دویغوم،
و شرافتلره اویغوم.
…
ساوالانلا اوجالیر بیل بوی آتانلار،
ساوالانلا چاتیر اعلایه چاتانلار،
ساوالانلا آییلیر ائلده یاتانلار،
ساوالانلا قوجالیر یوردو قانانلار،
ساوالاندان جالانیر جانیما غئیرت،
ساوالاندان گوج آلیر سئوگییه جانان،
ساوالاندان گوج آلیر هر ایگید اینسان،
ساوالاندان بوی آتیر گؤیلره قارتال.
ساوالانسیز کیمی بیدار اولابیلمز،
پئشیز اولماز نه ده دینار اولا بیلمز،
وطن عشقیله دولوب خالقا خریدار اولابیلمز،
ساوالاندیر منه سولطان،
اونون اسرارینا من قالمیشام حئیران.
…
ساوالان دویغومو قانیملا قاتیبدیر،
ساوالان ساتقین اولانلاری آتیبدیر،
ساوالاندیر منه دیوان،
ساوالاندیر منه جانان،
ساوالان سئوگیم اولوبدور بیل ازلده،
ساوالاندان گوج آلیر قوشما غزل ده،
ساوالان “قوچ نبی”‌م اولدو،
ساوالان “بابک”‌یم اولدو،
ساوالان بیغلاری بورغون و “کوراوغلو”،
ساوالان “ائیواز”یم اولدو،
ساوالان “شهریار”یم همده “نسیمی”‌م،
ساوالان “معجز”یم اولدو وده “صابر”،
ساوالان عشقیمه هم فیکریمه قایناق،
ساوالانیم سازیم اولدو، یازیم اولدو،
ساوالان عشقی منیم کؤنلومه دولدو،
کیشی‌لیک مردلیگه باشلانقیجیم اولدو،
ساوالانسیز یاشایانلار هامی سولدو،
باتیب ایتدی اونودولدو.
…
ساوالاندیر منه جانان،
و منیم دردیمه درمان،
من اونون شآنینه حئیران
او گولوستان،
او منیم عشقیمه پئیمان،
او باشیم دردینه درمان،
او منیم اؤلکه‌مه بیر باش،
او منیم یوردوما یولداش،
اونو سئو خالقی هارایلا،
اونا باش اَیمه‌ین اینسانلاری دانلا،
ساوالاندان گوج آلیب خالقینی یانلا.
…
ساوالان باشی بلالیم،
ساوالان قاشی هیلالیم،
ساوالان گؤزلری دولغون،
ساوالان دردلره وورغون،
ساوالان سانماکی یورغون.
ساوالان درده ییخیلماز،
ساوالان غمله سیخیلماز،
ساوالان باشیما باش‌دیر،
ساوالان دوشمنه داش‌دیر،
ساوالاندان یاپیشیب گؤیلره چیخ سن!
ساتیلان کس‌لری توت بوغ وده ییخ سن!