او دونیامدان بیر مکتوب
اکبر رضایی
من یاشادیم یاخجی یا پیس
دؤنن دئییلم اؤلموشم
هارایلاییب قان آغلاما
دؤنن دئییلم اؤلموشم
یالواریب آغلاساندا سن
کدرله چاغلاساندا سن
کؤنلونو داغلاساندا سن
دؤنن دئییلم اؤلموشم
ساچلارینی یولما گولوم
غم کدره دولما گولوم
چوخ آغلاییب سولما گولوم
دؤنن دئییلم اؤلموشم
فایداسی یوخ، سیزیلداما
باشیم اوسته قیریلداما
چوخ بوشونا زیریلداما
دؤنن دئییلم اؤلموشم
قبریمه مهریله دایان
یوخدو داها کیمسه هایان
مرد ایگید اولسام یا بایان
دؤنن دئییلم اؤلموشم
خالقیما اَیمیشم باشی
کیمسه‌یه آتمادیم داشی
دولاشدیرما چاتما قاشی
دؤنن دئییلم اؤلموشم
سئوگینی پایلا ائل‌لره
صبا ده‌یسین او تئل‌لره
آدیمدا دوشسه دیل‌لره
دؤنن دئییلم اؤلموشم
مهربانام مهربان اول
من اینسانام سن اینسان اول
سن عاغلیندا فراوان اول
دؤنن دئییلم اؤلموشم
دوز دانیشیب و دوز یاشا
اَللی یئتمیش یا یوز یاشا
آغلاما منده گؤز قاشا
دؤنن دئییلم اؤلموشم
چیرپما کندینی های- هویا
قاریشما چوخدا های- کویا
حیات بودور، بودور بویا
دؤنن دئییلم اؤلموشم
یوردونو سئو هم ائلینی
خالقینین همده دیلینی
کدرله بوکمه بئلینی
دؤنن دئییلم اؤلموشم
سَس‌سیز آغلا چوخ آغلاما
اؤزونو درده باغلاما
چوخ باغیریب هارایلاما
دؤنن دئییلم اؤلموشم
دور آیاغا قودرتیلن
باخما منه حسرتیلن
گئت یاشا خوش عزتیلن
دؤنن دئییلم اؤلموشم
خالقی عزیز سای هر آنی
یورد وطنی سئو هر آنی
چوخ دالیمجا گزمه… هانی؟!!!
دؤنن دئییلم اؤلموشم.
۱۰/۶/۹۳
