داغلار نیسگیلی
افراسیاب نوراللهی
واختیندا داغلارا گلمه‌دییمدن،
بیر نیسگیل بوغوردو ایچیمده منی.
قوللاریم یانیما دوشوردو هردن،
سؤزومه باخمیردی قیچیم دا منیم .
گلدیم، واختسیز گلدیم بو ایل داغلارا،
چیمنین نووراغی پوزولموش بیر آز.
گلدیم کی ساغالسین بو نیسگیل، یارا،
گلدیم باشا چاتسین بو آرزی،موراز.
داغلاردورور داغلیغیندا داغ کیمی،
نه حالی ده‌ییشمیش ،نه اوزو دؤنموش.
گلدیم ده، قالدیم دا، گئدیرم ایندی،
سن دئمه هامیسی اؤزوم اوچونموش.
ایسته‌سن داغلاردا ابدی یاشا،
ایسته سن اولفتی کسه بیلرسن.
گلرسن، دَه‌ییشر حالین بیر باشا،
گلمزسن، اؤزوندن کوسه بیلرسن.
1380
