بنؤوشه‌دن
عدالت دومان

دولدو وطن عطری یئنه
روحوما آل بنؤوشه‌دن.
شاعر کؤنلوم! ایلهامینی-
دویغونو آل بنؤوشه‌دن!

بیر اوتانجاق اینجه چیچک
سئوگی پای‌لار اتک-اتک
عشقین اولسون آغ کپنک
چکیرسن بال بنؤوشه‌دن.

طبیعتین ان شاه چاغی
اویانار یاشیل یارپاغی
نئچه عاشیق یار سوراغی
آلمیش بو لال بنؤوشه‌دن.

دومان”‌سیز بو گؤی سینه‌ده”
گؤزل‌لیک وئریر گونه‌ده
حیا‌لی داغ‌لار یئنه‌ده
اؤرتوبدو شال بنؤوشه‌دن.