chengiz

اوستاد “چنگیز مهدی پور”ا عشق اولسون!
حسن ایلدیریم

 او زامان کی انسانین دیلی اونون داخلی عالمینده باش قالدیران حس و هیجانلارینی ایفاده ائتمک‌ده چتین‌لیک چکیر، ائله او آنداجا موسیقی اونون کؤمه‌یینه چاتیر. دئمک موسیقی انسان معنویاتی‌نین، بدیعی ذوق و دوشونجه‌سینین،  بیرسؤزله گؤزه‌للیک فلسفه‌سینین ان دیرلی بدیعی ایفاده فورماسی‌دیر. بو بوتون خالق‌لاردا بئله اولموشدور. منیم ایفاده ائتدییم بو سؤزلرین چوخ دیرلی و چوخ درینی‌نی واختی‌لا بؤیوک عالم، فیلسوف  و شاعیرلر سؤیله‌میش‌لر. او جمله‌دن: فیلسوف‌لاردان شوپنهاور، شاعیرلردن‌ایسه هانریش هاینه‌دن بو ایفاده‌لره یاخین سؤزلر اوخوموشام. بیزیم ده بؤیوک شاعیریمیز سهند بو باره‌ده اؤز دویغو و دوشونجه‌لرینی بئله ایفاده ائتمیشدیر:

اوردا کی دیل- آغیز سؤزدن اوسانار

سوروشون مطلبی تئللر سؤیله‌سین

دوداق دانیشارسا اود توتار، یانار

گرکدیر زخمه‌لر،اللرسؤیله ‌سین.

سهند عاشیق صنعتمیزی خصوصی ایله آنا کیتابیمیز ساییلان دده قورقود داستانلارینی اوخویوب، اونلاری شعره چکدییی زامان بو فیکره چاتمیش و اونو بو فورمادا ایفاده ائتمیشدیر. منیم فیکریمجه، خالق‌لارین، مدنیت‌لرین، یورد- یووا‌لارین ان درین قاتلاریندا یئر سالان و زامان- زامان جیلالاشان، زنگینلشن فولکوریک موسیقیسی دونیادا بوتون موسیقی‌لرین کؤکو، آناسی و قایناغی‌دیر. بیزیم ده خالق موسیقیمیزین ان پارلاق نمونه‌سی اولان عاشیق موسیقیسی بو سایاق موسیقی‌لردن‌دیر.

عاشیق موسیقیسی، تاریخین ایلکین چاغلاریندان قایناقلانان، تاریخ بویو یاشایان، بوداقلانان، قول‌لانان بیر موسیقی اولسادا، آنجاق اونون خاللاریندا،رنگلرینده، ریتملرینده، ملودی‌لاریندا، اونا منسوب اولدوغو خالقین سئوگیسی، محبتی، نیفرتی، دؤزومو، آرزوسو، مبارزه‌سی، بدیعی – ایسته‌تیک دویومو، ملی بدیعی ذوقو، ائله ‌جه‌ده اونون یاشادیغی محیطی، طبیعتی، تاریخی، بیر سؤزله حیات فلسفه‌سی، عاشیق صنعتینین بدیعی ایسته‌تیک منشوروندان کئچه‌رک، هاوالارین سیماسیندا تجسم تاپمیشدیر و بؤیوک صنعتکارلارین واسطه‌سی‌ایله، اوبا- اوبا، اویماق- اویماق، کند- کند، شهر- شهر، اؤلکه- اؤلکه گزمیش گؤروب- گؤتورموش، گونو-گوندن زنگینلشمیش، زامانلا آیاقلاشا- آیاقلاشا بو گونوموزه گلیب، چاتمیشدیر.

بیز عاشیق موسیقیمیزین تاریخینه نظر سالدیقدا، بؤیوک دوهالار، بؤیوک استعدادلار و اولو صنعتکارلارین آدلاریلا راستلاشیریق و گؤزوموز اؤنونده تاریخده آدی ابدی‌لشمیش ده‌ده‌قورقود، ده‌ده قوربانی، ده‌ده علعسگر، عاشیق عدالت، … و بوگونکو عاشیق صنعتیمیزین دیرلی تالانتی، گؤرکملی یاردایجی صنتعکاری عاشیق چنگیز مهدی‌پور جانلانیر.

چنگیز میثیلسیز سولو ایفاچی اولدوغو حالدا، درین موسیقی بیلیینه ییه‌لنمیش، کلاسیک آذربایجان موسیقیسینی، موغام صنعتیمیزی، دونیا موسیقیسینی منیمسه‌میش، موسیقی علمینی اؤیرنمیش‌دیر. من دئیردیم کی چنگیز مهدی‌پورو عاشیق صنعتی تاریخیمیزده  سایدیغیم سویه‌لرین لاییقلی داوامچیسی و معاصر سیمالی صاحیبی کیمی حساب ائتمک اولار. بوگونکو شرایطده عاشیق صنعتینین مدرنلشمه‌سینده، اونون دونیایا یاییلماسیندا، دونیا سویه‌سینده تانینماسیندا، اونون باشقا موسیقیلرله سسلشمه‌سینده چنگیزین و اونون رهبرلیک ائتدییی دالغا گروپونون گؤستردییی بؤیوک جسارت و صرف ائدیک‌لری بؤیوک امه‌یه تای تاپا بیلمیرم.

چنگیز سازین سیملرینده یئردییشمه‌لریله برابر عاشیق هاوالارینی نوتا آلمیش، سازی نوت اوزه‌رینده اؤیرنیلمه‌سی اوچون نوت کیتابی یازمیشدیر. او سازی یوخ، سازلاری: جوره‌سینی، آناسینی، ویولونو، بالابانی، ضربی آلت‌لرینین مختلف نوع‌لرینی ائله مهارتله ارکسترلشدیرمیشدیر کی، هم عاشیق موسیقیسینی، هم موغامی، هم دونیا خالقلاری‌نین موسیقیسینی، ائله‌جه‌ده کلاسیک موسیقیسینی ایفاده ائتمه‌یه نائیل اولموشدور. عینی حالدا موغام، کلاسیک و عاشیق موسیقیسیلریندن یئنی سنتزلی اثرلر یاراتمیشدیر؛ دالغا موسیقی گروپونو قورموش و اونا رهبرلیک ائتمیشدیر. ایندی بو موسیقی گروپو 21ینجی عصرده، عاشیق موسیقیسینی دونیا کنسرت سالونلاریندا ایفاده ائدن یگانه گروپ‌دور. دالغا گروپو تکجه ایران دئییل، آذربایجان جمهوری‌سینده، تورکیه‌ده، تورک دیللی خالق‌لارین یاشادیغی اؤلکه‌لرده بؤیوک رغبت اویاتمیشدیر.

چنگیزین بو بؤیوک امه‌یینه، بیلیینه، صنعتینه گوره، اؤلکه‌میز ایرانین ان معتبر اوجاغی ساییلان: «شورای ارزشیابی هنرمندان، نویسندگان، شاعران کشور»  طرفیندن اونا بیرینجی دره‌جه‌لی وثیقه وئریلمیشدیر کی اؤلکه قانونو اوزره دوقتورلوق دره‌جه‌سینین معادلی‌دیر. بونو دا قئید ائدیم کی واختی‌لا بو عنوان: اوستاد علی سلیمی‌یه، اوستاد جلیل شهنازی، اوستاد عزت‌الله انتظامی، اوستاد جمشید مشایخی کیمی صنعتکارلارادا وئریلمیشدیر.

chengiz mehdipoor

من بیر وطنداش و کیچک قلم صاحبی کیمی بو اوغور مناسبتی‌ایله ایلک اؤنجه، آذربایجان خالقینی، موسیقیچیلریمیزی، عاشیقلاریمیزی، دالغا گروپونون دیرلی عضولرینی، مهدی‌پور‌لار عائله‌سینی، چنگیز معلمین دوستلارینی و ائله‌جه‌ده محترم عائله عضولرینی تبریک ائدیرم. اینانیرام موسیقی صنعتیمیزه هله چوخلو تحفه‌لر وئرجک‌دیر سئویملی صنعتکاریمیز، قارداشیم و دوستوم چنگیز مهدی‌پور. واختی‌لا چنگیزه یازدیغیم  شعرله سؤزومه سون قویورام:

منی کرمی له یاندی

عاشیق چنگیز مهدی پور اوچون

سازین بئشیینده  ترپت روحومو

شیرین رؤیالارا جومدور آ چنگیز!

قیزیل گول دونیاسی آنا لایلاسی

سازیندا کؤکلنمیش سیمدیر آ چنگیز!

×××

سازینین سیملری آلوودو، سودو

قورقود نفسی‌دیر، کرمین اودو

زخمه‌ندن سوزولور آنامین سودو

چال سیندیر جانیما ،سیندیر آ چنگیز!

×××

یار گئدیب یوللاردا غم ایزی قالیب

عؤمروم آغ گونلره تامارزی قالیب

گؤزومده، کؤنلومده مین آرزی قالیب

منی کرمی له یاندیر آ چنگیز!

×××

یاندیر “ایلدیریم”ی سازین سسی‌له

سپ کولون چؤللره داغ نفسی‌له

عاشیق دونیاسی‌نین «کرمی»‌سی‌له

اودلار دیاریندا دیندیر آ چنگیز!

1367

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4