Home / یادداشت / آذربایجان روزنامه‌سي و اونون باش مديري/ مجيد امين مؤيد

آذربایجان روزنامه‌سي و اونون باش مديري/ مجيد امين مؤيد


آذربایجان روزنامه‌سي و اونون باش مديري
مجيد امين مؤيد

 ایضاح: اوتوزینجی اون ایل‌لیک‌ین اول‌لرینده چوغ آغیر و گیزلی بیر شرایطده “آذربایجان” روزنامه‌سینین یئنی نشر دؤرو باشلاییر. چوخ تاسفله بو ایشین گئدیشاتی و نئجه اولماسی حقده، اونون نشرینده اشتراک ائدنلرین بیر تعدادینین قید حیاتدا اولماغینا رغما، هله ده گئنیش معلومات الده یوخدور. 142 نومره‌ده نشر اولونان بو روزنامه‌دن یالنیز بیر نومره الده‌دیر. چوخ تاسفله بیر جمعین زحمتی سایه‌سینده گؤرولن بو دیرلی ایشه انقلابدان سونرادا آچیقلیق گتیریلمه‌ییبدیر. “آذربایجان” روزنامه‌سینین ایکینجی تحریریه هیاتینین ترکیبینده اولان اوستاد مجید امین مؤید بیر نئچه ایل اول اوستاد بهزادینین آغیرلاما مراسیمینده بو باره‌ده کیچیک بیر ایضاح وئرمیشدیر کی آشاغیدا اوخوجولارا تقدیم ائدیریک. بو امیدله کی قید اولونان موضوعدا معلوماتلاری اولان شخصلر مطبوعات تاریخیمیزین بو حصه‌سینه ایشیق سالسینلار.

×××

بوتون ايران خالق‌لاري امپریاليزم خصوصي ايله انگليس امپریالیزمي و نفت شركتي علیهينه ووروشان زامان‌لار آزادليق سئور مطبوعات ايران‌دا بو موباريزه‌نين قاباقجيل نور ساچان چيراقلاري اولموشدور. آذربایجان قزئتي‌ده تقريبن 1330دان 1334ده‌دك، بو صف‌ده باش اوجاليق‌لا یئرلشيب و تاريخي رول اوینایيب‌دير.

آذربایجان روزنامه‌سي باشقا قزئت‌لرله بيرليك‌ده خلقيميزه هر هفته‌نين ان مهم مسئله‌لري‌ حقينده گؤستريش‌ وئريب، زحمتكش‌لرين حقوقوندان دفاع ائله‌یيب،‌ كندلي‌لردن خانلار و ارباب‌لار قارشيسيندا دفاع ائده‌رك، ضد اميریاليستي جبهه‌ده باريشماز موباريزه آپاريردي.

بيليرسيز كي، او ايل‌لر بير طرف‌دن انگليس و‌ها بئله آمريكا سلطه‌چي‌لری عليهينه كسگين موباريزه دؤورو ايدي و خالق‌لاريميز ايراده‌سي‌ايله نفت ميللي اولموش و توطئه‌لر ايران‌لي‌لاري تهديد ائديردي و هر حال‌دا نفتين ميللي‌لشمه‌سي ايران خالق‌لاري‌نين بؤیوك آرزوسو اولاراق، بيزيم بو قزئت‌ده بو اوميد و آرزولارلا ايره‌لي‌له‌یيردي و خالقين شادليق‌لارين عكس ائديردي.

 28 مرداد آمريكا- انگليس كودتاسیندان سونرادا دوشمن‌لرين هجوم دؤورو و شاهين آرتيق قولدورلوق زاماني اولوب. اون‌مين‌لر شريف اينسانلار دوستاقلارا و تبعيدلره معروض قاليب و یوزلر بؤیوك اينسانلار اعدام اولوندولار و یئنه‌ده روزنامه‌ميز بو دؤورده خالق ايله همدرد ايدي و چاليشيردي كي، اونلارا اوره‌‌ك وئريب و قارانليق زمانه‌نين كئچري اولماسين یادا سالسين.

آذربایجان قزئتي هفته‌ليك نشریه ايدي و بوسبوتون آنا ديلينده یازيلاراق، خالق ايچريسينده یایيليردي.

روزنامه‌نين باش مديری «بهزاد بهزادي» اولموشدور و باش مقاله‌لرين چوخو اونون قلمی‌ايله یازيليب‌دير. بو مقاله‌لر اساس و گون مسئله‌لره جاواب وئريردي.

اوستاد بهزادي‌نين نقشي‌ ساده‌جه مديرليك دئیيل‌دي. او سياسي باخيم‌دان اوستون و قدرتلي بير شخصیت و بير ديل اوستادي كيمي روزنامه‌ني اداره ائديردي. بهزادي ادبيات سئور و ذووق‌لو بير ضیالي اولدوقدا، اوستاد شهريارين «حيدربابایه سلام» اثرينه ايلک دفه درين معنالي و آراشديريجي تحليل و نقد یازميش و روزنامه‌نين نئچه نومره‌سينده چاپ اولونوب و روشنفكر جاوانلاري بو بؤیوك اثرله آشنا ائتميش‌دير. او تحليل یازيلاندا «حيدر بابا‌يه سلام» چاپ اولماقدا ايدي  و دئمك لازيم دئیيل كي، او قارانليق گون‌لرده بو اثر و تحليل آنا ديليميزي قوروماقدا بيزه چوخلو كؤمك اولموشدور و اثرين سرعت‌له خلق ايچريسينده یئر آچماسينا یارديم ائتميش‌دي.

روزنامه‌نين یازيچيلار هئیتي وار ايدي و یادلاردا قالان محمدعلي قوسي (فرزانه) و «عليقلي كاتبي» (آغ قوش) اوّل‌لرده و احمد شايا «آلاو»، «محمدحسين مبيّن» و من (مجید امین مؤید) ايكينجي مرحله‌ده بو هئيت‌ده عضو ايديك. باشقا دوستلاردان دا وار ايديلار کی چوخ تاسفله من آدلارينی یاددان چيخارميشام.

بو هفته‌ليك آنا ديلينده یازيليب یایيلان قزئت 1334- نجي ایلده پهلوي رژيمي شهرباني‌سي و اطلاعات مأمورلاري وسيله‌سي ايله تعطيله اوغرادي و چاپخانا‌سي دا توقيف اولاراق، اونون مسئول مديری حبسه آليندي. آمما گونش هميشه‌ليك بولود آلتيندا قالمادي.

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *