تانینمیش ساتیریست «منصور خانلو» وفات ائتدی

یاییلان خبره اساسا، آذربایجانین تانینمیش ساتیریستی منصور خانلو بهمن آیی‌نین ۲۸نجی گونو تبریز شهرینده وفات ائتمیشدیر. منصور خانلو اؤز دیرلی عؤمرونون بؤیوک بیر قیسمینی تبریزین «تربیت» کیتابخاناسیندا کئچیرمیش و کیتاب و کیتاب اوخوما عشقیله ده حیاتی باشا چاتمیشدیر.
عائله‌سی‌نین اصلیتی هشتری‌ ماحالیندان اولان منصور خانلو ۱۳۲۶نجی ایل ماراغا شهرینده آنادان اولموش و اینجه صنعت رشته‌سینده تحصیلینی بیتیرمیش، آنجاق انگلیس دیلی معلمی‌کیمی‌فعالیت ائتمیشدیر. ۱۳۵۰نجی ایلدن تبریزین تربیت کیتابخاناسیندا ایشه باشلامیش و اوردان دا تقاعده چیخمیشدیر.
منصور خانلونون یارادیجیلیغینا بیر چوخ کیتابلار داخیلدیر. او جومله‌دن: «تبریز قدیم»، «گؤزللیک آیناسی»، «آجی گولوش‌لر»، «آغلاماقدان سووشوب احوالاتیم»، «بهلول داننده گولو»، «۲۴ ساعات یوخو و آییقلیق آراسیندا(صمددن ترجمه)، «اونودولموش ماهنی»، «بوگونون بایاتی‌لاری»، «سؤز سؤزو گتیرر، آرشین بئزی(ضرب‌المثل‌لر)»، «آلبوم خنده»، «خود آموز زبان آذربایجانی»، «روزهایی که بابا نان می‌داد»، «بهلول می‌خندد»، «می‌خندم پس هستم»، «با راویان اخبار»، «کره‌ی زمین تیمارستان کرات دیگر است!»، «عقاب سفید»، «در خلوت شب» و …
حؤرمتلی اجتماعی شخصیت منصور خانلونون جنازه‌سی دوشنبه گونو (۲۹ بهمن) ساعت ۱۰:۳۰دا تبریز شهرینین وادی رحمت مزارلیغیندا تورپاغا تاپشیریلاجاق.
«ایشیق» – آذربایجان ادبیات و اینجه صنعت سایتی تانینمیش آذربایجان شخصیتی منصور خانلونون ایتگیسینی آذربایجان خالقینا، ادبی مدنی جمعیتیمیزه و مرحومون حؤرمتلی عائله‌سی و دوست تانیشلارینا «باشینیز ساغ اولسون!» دئییر و شرفلی خاطیره‌سینی عزیزله‌ییر.

«ایشیق» – آذربایجان ادبیات و اینجه صنعت سایتی
۲۸ بهمن ۱۳۹۷