«ادبیات سئونلر» گروهونون خبری اساسیندا یازیچی «ثریا خانیم خلیق‌ خیاوی»نین ایلک تورکجه رومانی «قفس‌ناز» باشلیغی آلتیندا ایشیق اوزو گؤردو. ۲۱۰ صحیفه‌دن عبارت بو کیتاب یازیچی‌نین رومان ژانریندا اولان ایلک اثری‌دیر و «آیدین ساو» نشری طرفیندن ۵۰۰ تیراژدا بوگونلر یاییلیبدیر. کیتابین اوز قابیغی‌نین دیزاینری « زهرا پیشکار»، ائدیتورو ایسه نورالدین مقدم(آیدین دومان)دیر.
«قفس‌ناز» کیتابینی ۲۸۰۰۰۰ تومن قیمتینده تبریزده ناشردن، اردبیل‌ و مشکین‌ده ایسه اعتبارلی کیتاب ساتیش ائولریندن و «ادبیات سئونلر» تلگرام کانالیندان (https://t.me/Adabiyyatsevanlar) الده ائتمک مومکوندور.
ثریا خانیم خلیق خیاوی ۱۳۵۳-جی گونش ایلینده خیاو (مشکین‌شهر) شهرینده دونیایا گؤز آچیب، تبریز و اردبیل شهرلرینده تحصیل ائدیب، فارس دیلی و ادبیاتی رشته‌سینده یوکسک لیسانس آلیبدیر.
ثریا خانیم خلیق خیاوی‌دن کئچن ایللرده ایکی شعر کیتابی نشر اولوب کی، سونونجوسو «دختر شهر یئری»( شهر یئری قیزی) آدی‌یلا یاییملانیبدیر. بو کیتاب فارسجا یازیلیب، آنجاق قونولاری تام آذربایجانا عاییددیر. بوندان علاوه ثریا خانیم خلیق خیاوی‌ اوچ کیتاب دا ترجمه ائدیبدیر. (خبرین سونو)