بیر نئچه گون اول آلمانیادا اوره‌‌ک انفارکتی نتیجه‌سینده ابدیته قووشان سئویملی آذربایجان صنعتکاری خواننده «ناصر تفضلی – اشکریز»(ناصر سهند)ین خاطیره‌سی آنا یوردو تبریزده عزیزلندی.
خرداد آیی‌نین ۸-نجی گونو تبریزین «تامین اجتماعی» سالونوندا کئچیریلن مراسیمده بیر چوخ ادبیات و اینجه صنعت خادیملری، اجتماعی شخصیتلر، صنعتکارین عائله عضولری و سئونلری ایله برابر آذربایجان مدنیتی هوسکارلاری دا اشترک ائتدیلر.
«حسن انداچه»نین تشکیلاتچیلیغی و «کریم رستمی»نین آپاریجیلیغی ایله ایکی ساعات یاریم داوام ائده‌ن بو تدبیرده سئویملی صنعتکار «ناصر سهند»ین اؤز سسیله ایفالاری اشتراکچیلار اوچون سسلندی. بوندان علاوه، بیر نئچه آذربایجان صنعتکارلاری او جومله‌دن: یداله سلطانی، علی مظفری، اسد عباسی، حسن جداری، یعقوب مطلوبی و محمد جدیری؛ اوستاد یوسف عبدالعظیم‌زاده و محمد طراح‌ین رهبرلیگی ایله موسیقی پارچالاری ایفا ائتدیلر.
مراسیمده بیر تعداد آذربایجان شاعر و ادبیاتچی‌لاری او جومله‌دن: حبیب فرشباف، جعفر تانیش، مسعود شریعتی، میرزا شهرک، حسن کافی، حسن اومیداوغلو، رحیم علیپور، احد ترابی و … اؤز شعرلری ایله صنعتکارین خاطیره‌سینی حؤرمتله یاد ائتدیلر. همچنین سئویملی صنعتکارین گنجلیک دوستو «رضا شهیدی» اؤز دوستلوق ایللریندن دانیشاراق، صنعتکار دوستونون شخصیتیندن سؤز آچمیش، اونون نه قده‌ر صمیمیتله اؤز ملتینه و خالقینا باغلیلیغیندان دانیشمیشدیر.
مجلس اشتراکچیلاریندان و تدبیری حاضیرلایانلارین امه‌یینی قیمتلندیرمک اوچون، سئویملی صنعتکارین قارداشلاری «ابراهیم» و «مهدی» تفضلی ده چیخیش ائدیب، عائله طرفیندن مجلس اشتراکچیلارینا اؤز تشکرلرینی بیلدیردیلر.
تدبیر زامانی سئویملی صنعتکارین ابدی آیریلیغی موناسیبتیله مجلیسه گؤندیریلن مئساژلار دا اوخوندو.
بو خاطیره تدبیریندن بیر نئچه شکیلی و بیر پارچا موسیقی ایفاسینی عزیز اوخوجولارا تقدیم ائدیریک:
(شکیل‌لر: کریم رستمی)
