Home / خبر / اکبر برزگری(سرور موغانلی)نین خاطیره‌سینه ادبی گؤروش کئچیریلدی

اکبر برزگری(سرور موغانلی)نین خاطیره‌سینه ادبی گؤروش کئچیریلدی

اکبر برزگری(سرور موغانلی)نین خاطیره‌سینه ادبی گؤروش کئچیریلدی

دی آیی‌نین ۲۰سینده موغانین (پارس‌آباد)ین «اوستاد شهریار» آدینا ادبی انجومنی‌نین تشبثی ایله شاعر اکبر برزگری‌نین(سرور موغانلی- نوید سرور) اؤلومونون بیرینجی ایل دؤنومو موناسیبتیله خیاو(مشگین‌شهر)ین شاعرلرینین اشتراکیلا ادبی تدبیر کئچیریلدی. بو محتشم ادبی گؤروشده موغان و خیاو شاعرلری اؤز اثرلریندن اوخویوب و مرحوم شاعریمیزین خاطیره‌سینی عزیزله‌دیلر. مجلیسده موغان شاعرلریندن: بهروز صدیق، اسماعیل خرمی، پریسا حیدری، قوجا گلدسته، پاشا موغانلی، توحید نامور(آدلیم)، فتح‌الله پناهی(عربلی)، بیابانی و ارشاد اداره‌سینین رئیسی جناب‌هاتف و خیاو شاعرلریندن‌ایسه: یعقوب نیکزاد، سحر خیاوی، حکیمه باباکشی‌زاده«نغمه»، ایرج امامی(دومان یالچین)، علی فلاح‌پور(گونش)، کیوان قربانی، عرفان کاظمی، رسول پناهی، عوض علیزاده (آلیش)، خاطیره عبدالعلی‌زاده و توحید فتاح‌زاده اشتراک ائتمیشدیلر.
«شعرلرینده «سرور موغانلی» و «نوید سرور» تخلص ائدن «اکبر برزگری مولان» ۱۳۴۱نجی ایل قاراداغین مولان کندینده آنادان اولوب، بوتون عؤمرونو موغاندا، سونراایسه تبریز شهرینده یاشاییبدیر. تاسفله چوخ آز بیر مدت خسته‌لیکدن سونرا ۱۳۹۵نجی ایل دی‌آیی‌نین ۲۳نجو گونو حیاتلا وداعلاشمیشدیر.
اکبر برزگری مولان» انقلابدان سونرا اجتماعی فعالیتلریله یاناشی جدی صورتده ادبیاتا و خصوصیله شعر دونیاسینا آددیم آتدی. شعرلری و مقاله‌لری آلتمیشینجی ایللرین اوللرینده تبریز شهرینده یاییلان «فروغ آزادی» روزنامه‌سینده چاپ ائدیلدی. چوخ چتین بیر وضعیتده بو ایللرده تبریز شهرینده تشکیل ائدیلن ادبی محفیللرده فعالجاسینا اشتراک ائتدی؛ دونیا گؤروشونون گنیش اوفوقو اونو آزادلیق وورغونو، صلح سئور، خالقلار دوستلوغونو تبلیغ ائدن و اجتماعی عدالت عشقیله یازیب یارادان بیر ادبیاتچی کیمی‌‌ادبی جمعیتیمیزده تانیتدی. حیات سیخینتیلاری و اجتماعی محرومیتلر سارسیلماز اراده‌سینه خلل یارادا بیلمه‌دی؛ معین سببلر اوزره داوام ائتدیره بیلمه‌دیگی تحصیلینی یئنی‌دن داوام وئرمک فیکرینه دوشدو. بیر نئچه ایل مطبوعاتدان و ادبی محفیللردن اوزاقلاشدی. «معمارلیق» رشته‌سینده یوکسک لیسانس صاحیبی اولدو و بو رشته‌ده خصوصیله‌ده «فلسفه هنر» اوزره ساوادلی بیر علمی‌مرجع شخصیته چئوریلدی. آزاد اسلامی‌دانشگاهی‌نین تبریز و پارس‌آبادمغان واحدلرینده معمارلیق اوستادی عنوانیندا تدریس ائتدی و بیر چوخ اؤیرنجی‌لرین تعلیمینده جدی فعالیتلر گؤستردی. «کبد سرطانی» خسته‌لیگینه دوچار اولدوغو سببیندن چوخ تاسفله دی آیی‌نین ۲۳ینده ابدی‌لیک اولاراق آرامیزدان آیریلدی و شرفلی عؤمرونون سون شعرینه قورتاریش نقطه‌سی قویدو.
اکبر برزگری‌نین(سرور موغانلی- نوید سرور) خاطیره‌سینه تشکیل ائدیلمیش تدبیردن شکیل‌لری سیز حؤرمتلی اوخوجولارا تقدیم ائدیریک. بو شکیل‌لری و تدبیرین معلوماتینی بیزه گؤندرن حؤرمتلی «پریسا خانیم حیدری»‌یه اؤز منتدارلیغیمیزی بیلدیریریک.

About ایشیق

One comment

  1. اللرینیزه ساغلیق دئیرم یولینیز اوغورلو اولسون. وار اولاسینیز

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *