چوخ تاسفله، آذربایجان مدنیتی‌نین یورولماز و صمیمی خادیمی، تبریز مدنی محیطی‌نین تانینمیش و سئویلن شخصیتی، بوتون عؤمرونو آذربایجان موسیقیسی و اینجه صنعتی‌نین تبلیغینه حصر ائدن،‌ یورولمادان موسیقیمیزین انکشافینا و جمعیتده یاییلماسینا امک صرف ائدن «سید رضی حسینی» شنبه گونو بهمن آیی‌نین ۲۱ینده ۸۳ یاشیندایکن یاشادیغی تبریز شهرینده حیاتلا ابدیلیک وداعلاشدی.
1319نجی ایل حیاتا گؤز آچان «سید رضی حسینی» گنج چاغلاریندان آذربایجان موسیقیسی و ادبیاتی‌نین مفتونو اولموش، خصوصیله‌ده انقلابدان سونرا آذربایجان موسیقی نمونه‌لرینین چوخ چتین بیر اجتماعی شراییطده یاییلماسیندا صمیمیتله چالیشمیش و موسیقی هوسکارلارینین غیررسمی تعلیمینه وار قوه‌سی ایله شراییط یاراتمیشدیر و بو شرفلی ایشی عؤمرونون سونونا قده‌ر داوام ائتمیشدیر.
ایشیق – آذربایجان ادبیات و اینجه صنعت سایتی- امکداشلاری آدیندان خالقیمیزین سئویلن اوغلو و مدنیتیمیزین انکشافیندا و تبلیغینده یورولمادان عؤمرونون سونونا قده‌ر چالیشان دوستوموز «سید رضی حسینی»نین خاطیره‌سینی عزیزله‌ییر، حؤرمتلی عائله عضولرینه، دوست و تانیشلارینا، حؤرمتلی «صدیق» عائله‌سینه و عزیز تدقیقاتچیمیز جناب محمدعلی حسینی‌یه -«باشینیز ساغ اولسون!» دئییریک. خاطیره‌سینه عشق اولسون.

ایشیق – آذربایجان ادبیات و اینجه صنعت سایتی
۲۲/۱۱/۱۴۰۲