آذربایجان کلاسیک شعرینین گؤرکملی نوماینده‌لریندن اولان «حیران خانیم»ین سئچیلمیش اثرلری «حکیم نظامی گنجه‌ای» یایین ائوی طرفیندن یاییلدی. «پریسا خانیم ساعی»نین امه‌یی سایه‌سینده ۲۸۶ صحیفه‌ده ایشیق اوزو گؤرن بو کیتاب حاقیندا «پریسا خانیم» بئله یازیر:
(اون سکگیزینجی یوز ایلین سونلاریندا مؤحتشم تبریز شهرینده ایشیقلی دونیایا گؤز آچان حیران خانیم، آذربایجانین احساسلی، درین دوشونجه‌لی و بیلگین شاعره خانیملارینداندیر. بعضی منبعلره گؤره ۸۰ و بعضی منبعلره گؤره ۷۰ یاشلاریندا دونیاسینی ده‌ییشمیش اولوب. (دانشمندان آذربایجان، آذربایجان غزللری، آذربایجان دولت نشریاتی، آذربایجان علم‌لر آکادئمیاسی‌نین ادبیات تاریخی انستیتوتو)
هابئله رحمتلیک پروفسور دوکتور هئیت، وزین وارلیق ژورنالی‌نین اؤزه‌ل «آذربایجان ادبیات تاریخینه بیر باخیش» کیتابیندا یازیر: حیران خانیم ۱۸نجی یوز ایلین سونلاری، ۱۹نجی عصرین بیرینجی یاریسیندا یاشاییب، آتا طرفی ناخجوانلی و آنا طرفی ایسه دونبوللی طایفاسیندان، اؤزو ایسه تبریزلی‌دیر و تبریز- خوی شهرلرینده یاشاییبدیر. مختلیف منبعلره اساسلاناراق ظریف طبعلی، اینجه روحلو آذربایجان قادین شاعرهسی حیران خانیمین شعر دیوانیندا تخمیناً ۴۵۰۰ تورکجه، فارسجا غزلی و گؤزل، اوره‌ک اوخشایان ترجیعبند، مخمّس، ملمع(بویالی)، مثنوی و منظومه‌لری واردیر. آنجاق تأسفله بیر چوخ شاعرلر کیمی حیران خانیمین دا اؤزوندن سونرا بیر چوخ شعرلری معلوم اولان ندنلردن دولایی ایتیب، باتیب، آرادان گئتمیشدیر و مختلف شهرلر او جومله‌دن: باکی، تبریز، ارومیه و س… شهرلرده چاپ اولوب، یاییلمیش اثرلری ده تحریفه اوغرامیشدیر. لاکن قئید ائتمهلییم کی، آذربایجان ادبیات تاریخینه اساسلاناراق، شاعره خانیمین دیوانی‌نین ان مکمّل نوسخه‌سی اؤزونون تاپشیریغی ایله یازیلمیش باکی نوسخه‌سی‌دیر. همین نوسخه آذربایجان رسپوبلیکاسی ال یازمالار انستیتوتوندا ساخلانیلمادادیر.
حیران خانیم آذربایجانین گوجلو کلاسیک شاعر‌لریندن اؤزه‌للیکله فضولی و نسیمی‌نین ادبی یارادیجیلیقلارینی اوخویوب، اؤیرنمیش و اونلاردان تأثیر آلمیشدیر. بیر چوخ شاعره نظیره یازمیش و بیر چوخ شاعر اوندان تأثیر آلمیشدی.
سون سؤز اولاراق حیران خانیم مختلف قالیبلرده و فورمالاردا اوره‌ک سؤزلرین قلمه آلمیش و بو اثر صنعتکارلیق باخیمیندان گؤزه‌ل، اوره‌ک اوخشایان و اولدوقجا زنگین‌دیر. اوماریم کی حیران خانیمین اثرلری دیوانی ادبیات سئورلره و ادبیاتیمیزا اوغورلو اولسون.)
پریسا ساعی
ایشیق
چئویرن: ایشیق
ترجمه: ایشیق
سسلندیرن: ایشیق
- خبر
- اوخوماق زامانی: < 1 دقیقه
- https://ishiq.net/?p=34426
چاپ
