۲۰۱۵۰۲۰۸_۱۶۳۲۰۹
مظفر درفشی اؤلمزدیر…
(آذربایجان ادبی-مدنی درنک‌لری‌نین بیاننامه‌سی)

 دونیا سندن کیملر کئچدی!

 ازلدن بئله‌دیر چونکی کائنات
جهان دائمی‌دیر عؤمور آمانات
الدن- اله کئچیر وفاسیز حیات
بیز گلدی- گئده‌ریک سن یاشا دونیا!

اؤلکه‌میزین اونودولماز اجتماعی– ادبی سیماسی، ۲۱ آذر نیشانلی آذربایجان اوغلو  اوستاد مظفر درفشی (م.بشیر) دونیادان کؤچدو. «شاعرلر مجلیسی»‌نین یگانه یادگاری جیسمن سیرامیزی ترک ائتسه ده، ادبیات عالمینده، موباریز شعریمیزین اؤن سیرالاریندا اؤز نیشانی اولان اثرلری ایله  یاشاماقدادیر.

آذربایجانین، بوتونلوکله ایرانین اؤتن ۷۰ ایل بویونجا، ائله مهم بیر حادیثه‌سی اولماییب کی مظفر درفشی‌نین اورادا  ایزی و نیشانی اولماسین. او، عؤمور بویو اؤلکه‌میزین سعادتی، ایران داخیلینده یاشایان خالقلارین خوشبختلیگی، قارداشلیغی و بیرلیگی اوغروندا چالیشمیشدیر. دونیادا صولح و آزادلیق و اجتماعی عدالت اوغروندا گئده‌ن موباریزه‌نی اورکدن آلقیشلامیش و بو یولدا اؤز قلمینی بیر آن دا یئره قویمامیشدیر. اؤلکه‌میزین ادبیاتی و ائولادلاری‌نین تربیه‌لنمه‌سی اوغروندا بیر شاعر، ژورنالیست، معلیم کیمی‌وار قوه‌سی ایله امک صرف ائتمیشدیر.

او گنجلیگینده، «شاعرلر مجلیسی»نین استعدادلی عضوو، معلیم‌لر دانشسراسی‌نین معاوینی و…س وظیفه‌سینده چالیشمیشدیر.

۳۰- ینجی  ایللرده اینگیلیس‌ استعماری علیهینه قورتولوش اوغروندا گئده‌ن موباریزه‌نین سیرالاریندا بیر اجتماعی و ادبی فعال کیمی‌بؤیوک هوس و ایراده ایله چالیشمیشدیر. تهراندا نشر اولونان نشریه‌لرین یارانماسیندا اوستاد بهزاد بهزادی ایله بیرلیکده «بشیر آینده»، «بشریت» و «آذربایجان» روزنامه‌لری‌نین داخیله مدیری کیمی‌ایشله‌میش و آذربایجان انجمنی‌نین یارانماسیندا میثیلسیز خدمتلری اولموشدور. بو مبارزه ده، آمریکا – اینگیلیس و دربار طرفیندن ترتیب ائدیلمیش کودتا اثرینده دئوریلن دوکتور مصدق‌ین میللی حکومتیندن سونرا سورگونلره، زندان‌لارا معروض قالان  مظفر درفشی (م.دؤنمز) مبارزه عزمینی ایتیرمه‌دن اؤز آرمانی و اینامینا صادق قالمیشدیر .

انقلابدان سونرا دا استاد درفشی فعالیتینی داهادا آرتیرمیش. «آذربایجان انجمنی» یئنی‌دن قورولاندان سونرا اونون مدیره هئیتینده چالیشمیش و «انجمن» آدلی درگی‌نین باش یازاری و مدیری کیمی‌ادبیاتیمیزین چیچکلنمه‌سی اوغروندا دیرلی آددیملار آتمیشدیر و ائله‌جه‌ده ۷۰ینجی ایللرین اولیندن فعالیته باشلایان «صابر ادبی انجومنی»نین صدری و‌هابئله باشقا ادبی انجومن‌لرین او جمله‌‌دن «ساهر ادبی- مدنی درنه‌یی»نین و «آذربایجان ادبیاتی اوجاغی‌»نین آغ ساققاللاری سیراسیندا بؤیوک حؤرمته مالک شخصیتلردن و ایران یازیچی‌لاری اوجاغی‌نین اعتبارلی عضولریندن اولموشدور. اوستاد عینی حالدا مطبوعاتی فعالیتیندن ده ال گؤتور‌مه‌میشدیر. صابر انجومنی‌نین داخیلی درگیسی‌نین مسؤل مدیری و باش یازاری و ائله‌جه‌ ده «آذری مجله‌سی»‌نین تحریریه هیئتی‌نین عضوو کیمی‌چالیشمیشدیر.

موباریزه اعتباریله آذربایجانین آدلیم عائله‌لریندن اولان مظفر معلیمین اؤلمز خاطیره‌سی – بیر دیرلی وطنداش، مباریز شاعر، متین اجتماعی شخصیت، آلچاق کؤنوللو بیر انسان، اؤتکم بیر آغ ساققال کیمی- اونون یولونو دوام ائتدیرن شاگیردلری و قلمداشلاری‌نین اوره‌یینده یاشایاجاقدیر.

اوستادین اؤلمز و پارلاق خاطیره‌سینه عشق اولسون!

  • صابر ادبی انجومنی
  • ساهر ادبی- مدنی درنه‌یی
  • آذربایجان ادبیاتی اوجاغی‌
  • «آذری» درگیسی
  • «ایشیق»- آذربایجان ادبیات و اینجه‌صنعت سایتی
  • خدافرین ادبی انجومنی
  • دده قوربانی ادبی انجومنی
  • آراز ادبی انجومنی
  • قاراداغ ادبی انجومنی
  • چیچک‌لر قورولوشو
  • ماوی چیچک‌لر درنه‌یی
  • آذربایجان مدنی درنک‌لر بیرلیگی
  • کرج‌ده یاشایان آذربایجانلی‌لار درنه‌یی
  • اندیشه نو (فرزانه) انتشاراتی

۱۸ بهمن ۱۳۹۳