images
گونشين هديه‌سي(علمي ناغيل)
واقف صمداوغلو

چوخ- چوخ اوزاق زامانلاردا، يئر اوزونده ياشايان بيتکي‌لر بالاجا، رنگسيز و ضعيف‌ايدي. اونلار اؤزلرينه يئمک تاپا بيلميرديلر و آجليق چکيرديلر. اوزون مدت چيخيش يولو آختاراندان سونرا، اونلار گونشدن کؤمک ايسته‌ديلر. قوروموش بوداقلاريني گؤيه قالديرديلار؛ گونش بيزه کؤمک ائت- يالوارديلار.
گونش فيکيرله‌شيب راضي اولدو.
–  ياخشي- دئدي گونش. – سيز دئديگينيز اولسون. من سيزه “کلروفيل” آديندا سئحيرلي ياشيل بويا باغيشلاييرام. سئحيرلي کلروفيله صاحب اولان هر کس منيم قيزمار شعالاريمين گوجوايله عادي سو و‌هاوادان دونيادا ان لذتلي يئمک‌لر حاضیرلايا بيلر. ايندي‌ايسه هديه‌مي قبول ائدين!
بونو دئييب گونش سئحيرلي دعا اوخودو و همين آن بوتون بيتکي‌لر کلرفيله دولوب ياشيل رنگه بوروندولر.
–  چوخ ساغ اول گونش- تشککور ائتدي بيتکي‌لر.
–  ديمز- جاواب وئردي گونش. – آمما بيلين کي، منيم‌ده سيزه بير شرطيم وار: سيز‌هاواني تميزله‌مه‌ليسينيز کي، دوستونوز حيوانلار سربست‌هاوا آلسينلار. سئحيرلي کلروفيلين کؤمکي‌ايله سيز‌هاواني تميز و شفاف ائده‌جکسينيز.‌هاوا تميز اولماسا، بوتون حيوانلار بوغولار. اونا گؤره‌ده سيز دوستلارينيز حيوانلار اوچون‌هاواني تميزله‌مه‌ليسينيز.
بيتکي‌لرين چوخو بو شرطله راضي اولدو و‌هاواني تميزله‌مه‌يه باشلادي.‌هاوا قيسا بير مدتده آلماس کيمي تميز و آيدين گؤرونوردو. گونش‌ده بيتکي‌لرين قاباغيندا بورجلو قالمادي. اونلارا بؤيومک، چيچکلنمک و بار گتيرمک گوجونو باغيشلادي.