ديوار اوستونده ايكي پيشيك
صمد بهرنگي – ترجمه: ع. آغ گونئيلي

 ياي گئجه‌لري‌نين بيري ايدي. آي چيخماميشدي. گؤيده‌ ده اولدوز يوخ ايدي. هاوا قارانليق‎ايدي. گئجه ياريسي ايدي، بؤجوك‌لرين جورولتوسوندن باشقا بير سس يوخ ايدي. قارا بير پيشيك، باشيني آشاغي سالاراق ايي چكه- چكه اهمالجا ديوارين او باشيندان گليردي. آغ بير پيشيك‌ ده باشيني آشاغي سالاراق ايي چكركن ساللانا- ساللانا ديوارين بو باشيندان گليردي.

پيشيك‌لر گلديلر، گلديلر… دوز ديوارين اورتاسيندا، اونلارين كلّه‌لري بير- بيرينه توققوشدو. پافيلديياراق، هر ايكي‌سي‌ ده جلد دالي چكيلركن، گؤت‌لري اوسته اوتوراراق گؤزلريني بير- بير‌لرينه زيلله‌‌ديلر. ايكي قاريشدان چوخ آرالاري يوخ ايدي. ايكي‌سي‌نين‌ ده اوره‌يي گوپ- گوپ ووروردو. بير نئچه آن بئله‌جه اوتوردولار. سونرا بير- بيرلرينه باخاراق ميريلداديلار. نهايت قارا پيشيك ايره‌لي سوروندو. آغ پيشيك يئرينده ترپه‌شرك دئدي:

– ميياووو!.. ايره‌لي گلمه!..

قارا پيشيك اونو سايمادي. يئنه ده قاباغا سوروندو. پيشيك‌لر ايكي‌سي‎ده ميرتلانيرديلار. بير قاريش قده‌ر آرالاري واريدي. قارا پيشيك‌ يئنه‌ده ايره‌لي سوروندو. آغ پيشيك معطل ائتمه‌دن تئز جايناغيني اوزاداراق قارا پيشييين قولاغيني پارچالاياراق چيغير- باغير سالدي:

– ميياووو!…پيف‌ف!… آخماق دئمه‌ديم ايره‌لي گلمه.

قارا پيشيك ‌ده مووولداياراق چيغيردي:

– پاف‌ف!..

آنجاق او اؤز رقيبيني يارالايا بيلمه‌دييينه گؤره يامان حيرصلندي. بير آز دالي چكيليب آياق اوسته دوروب دئدي:

– ميياوو!.. چكيل اويانا، قوي گئديم. يول وئرمه‌سن پيسلييين مندن گؤرمه! قارا پيشيك قاققا چكيب گولدو. سيبيل‌لريني يالاركن دئدي:

– قريبه گولمه‌لی دانيشيرسان. اؤزون چکيل اويانا قوی من گئديم. يول وئرمک ياخشي‌ديرسا بس نه اوچون سن منه يول وئرميرسن، گئده‌ك ديوارين او باشينا. قارا پيشيک دئدي:

 – دئديم ‌كي، سن يول وئر من كئچيم، سونرادا سن اؤزون بيليرسن نه جور اوره‌يين ايسترسه ائله کئچ گئت.

آغ پيشيک اوجادان گوله‌رک دئدي:

-اگر سؤزومه باخماسان, بير تيکه ائله‌ييب اودارام سني.

قارا پيشيک عصبي‌لشه‌رک, بيردن چيغيردی:

– ميياووو!.. دئديم قاييت گئت داما, قوی من گئديم سيچانين بيري سيچان!..

بو سؤز آغ پيشييين غئيرتينه توخوندوغونا گؤره, او گولوشونو کسدي. اونون سسي تيتره‌دي. دريندن بير باغيرتي چکدي:

– ميياووو!.. دئدين سيچان آخماق!.. پيف‌ف!.. توت گؤروم!.. پيف‌ف!.. او بير داها جايناغيني قارا پيشييه توللادي. قارا پيشيك بو دؤنه اونون جايناغي‌نين ضربه‌سيندن قاچاراق, جايناغي ايله ووروب آغ پيشييين بورنونو پارچالادي. آغ پيشييين بورنوندان قان شيريلدادي. ايندي داها آغ پيشييي ساخلاماق چتين ‌ايدي. او بئليني دونبالداراق بوتون توک‌لري بيز- بيز دوردو. ائله هاي- کوي سالدي کي, بؤجک‌لر جورولتولريني کسه‌رک اونون هاي- کويونه قولاق آسديلار. آچماق‌دا اولان بير قيزيل گول ايسه ياريمچيق قالدي. گؤيده بؤيوک بير اولدوز آخيب دوشدو.

قارا پيشيک حیرصلی- حیرصلی دئدي:

– ميياووو!.. ائشيتمه‌دين‌مي دئديم قاييت گئري‌يه قوي گئديم؟ سيچانين بيري سيچان!.. ايندي قارا پيشييين گولمک نؤوبه‌سي ايدي. او گوله‌رك دئدي:

– بيرينجي بو کي, سيچان قارا اولماز، بلکه چوخو آغ اولار. ائله اونا گوره ‌ده سيچان سن اوزون‌سن. ايکينجي‌سي ‌ده بو کي, چوخ هاي- کوي سالارسان، آداملار يوخودان اويانارلار، چکيب هر ايکيميزي ‌ده کؤتک‌لرلر. منيم کي, هاي- کويدن قورخوم يوخدور؛ گئري ده قاييداسي دئييلم. او قده‌ر بورادا اوتوراجاغام ‌کي, بلکه حؤوصله‌ني الدن وئريب قاييديب گئده‌سن ايشيوين- گوجووون داليجا.

آغ پيشيک بير آز ساکيت‌له‌شرک دئدي:

-من حؤوصله‌دن چيخاسي دئييلم. بير گون گؤره‌يدين ‌کي, ناهار واختي من کلّه‌چي‌نين آشپازخاناسيندا بير سيچان يوواسي‌نين قارشي‌سيندا نه جور کيپريک وورمادان اوچ ساعات بير ديليمه دايانميشديم.

قارا پيشيک داها دينميردي، ساکيت‌جه‌سينه گؤتو اوسته اوتورموشدو. آغ پيشيک‌ده اونا تاي دينمزدن گؤتو اوسته اوتورموشدو. بير اوشاغين آغلاماسي‌نين سسي گلدي. سونرادا اونون سسي کسيلدي. بؤجک‌لر يئنه ‌ده جورولده‌ديلر. آچيلماقدا اولان قيزيل گول آچيلماسينا داوام ائده‌رک خيشيلدادي. ايکي دقيقه‌يه قده‌ر پيشيک‌لر گؤزلرين بير- بيرينه زيلله‌ديلر. هئچ بيري اوزدن گئتمه‌دي. آنجاق گؤرونوردو ‌کي, صبيرلري توکنمکده‌دير. هر بيري ايسته‌ييردي كي، او بيري‌سي سؤزه باشلاسين.

بيردن- بيره آغ پيشيک ديللندي:

-من بير چيخيش يولو تاپميشام.

قارا پيشيک سوروشدو:

-ديء گؤره‌ک نه‌دير؟

آغ پيشيک دئدي:

-منيم واجيب ايشيم وار، اؤزو ده چوخ واجيب‌دير؛ گل سن قاييت گئت ديوارين آخيرينا، من کئچيم گئديم سونرادا سن گئت.

قارا پيشييي گولمک توتاراق دئدي:

-ائه، غريبه يول تاپدين، منيم ايشيم سنين‌کيندن‌ ده واجيب‌دير. بئله ياريم ثانيه ‌ده يوبانا بيلمه‌رم.

آغ پيشيک ملول‌جاسينا دئدي:

-سن يئنه ‌ده سازيوي باشقا جوره کؤکله‌دين‌. دئديم کي, منيم واجيب ايشيم وار، گل سن قبول ائت، چکيل اويانا قوي من گئديم.

قارا پيشيک سسيني اوجالتدي:

– ايه، سن نچي‌سن منيم اوچون امر بويوراسان؟.. دانيشيغيني آنلا!..

آغ پيشيک ميريلداياراق آياغا قالخيب چيغيردي:

– من نه دانيشديغيمي ياخشي باشا دوشورم، آنجاق سن عنادکار پيشيک‌سن، من حسن کلله‌چی‌ ائوينه گئتمه‌لي‌يم. اورادان کلله‌پاچا اييی آلميشام. ايندي آنلادين‌مي ايشيم نه قده‌ر واجيب‌دير؟

قارا پيشيك ميريلداياراق دئدي:

– ميياووو… سن ائله بيليرسن كي، من بو ديوارلارين باشيندا ائله بئله‌سينه بوش- بئكار دولانيرام. من ده اويانلاردا قورماسبزي قوخوسو آلميشام، يامان‎دا آجام. بير داها يولومدا دايانماق ايسته‌سن ائله وورارام كي، ديواردان دوشرسن، بئينين پارتلار.

آغ پيشيك اؤزونو ساخلايا بيلمه‌ييب دريندن چيغيردي:

– ميياووو… آخماق دئديم چكيل اويانا… پيف‌ف‌ا.. توت !.. گلدي و بيردن- بيره، جايناق‌لاري ايله قارا پيشييين توك‌لريني قارماقلادي.

پيشييين توك‌لري بوتون هاوايا داغيلدي. هر ايكي‌سي‎ده پيف- پيف ائده‌رك بير- بيرلرينه يامان- يوووز ياغديرديلار.

 پيشيك‌لر ائله‌جه‎ده دالاشماغا مشغول ايديلر، بيردن كيمسه‌ اونلارين اوستونه سويوق سو سپدي. پيشيك‌لر ال- آياق‌لاريني ايتيره‌ركن جلد قاييديب قاچديلار.

اونلارين ايكيسي ‌ده گلديك‌لري يول‌ ايله قاچاركن قاييديب دال‌لارينا دا باخماديلار.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4