«نرگيز آي نرگيز گوٍلوٍ…»
هوشنگ آشورزاده – چئویرن: ع. آغ‌گوٍنئيلي

ماشين‌لار يوللانارکن، کيشي ماشينلارين قاباغيندان چکيليب گئتدي خيياوانين قيراغيندا داياندي. ماشين‌لارين ايقزوزوندان چيخان توٍستوٍ اونو اؤسکوٍرتدوٍ. بوش اليني، آغزينين قاباغيندا ترپه‌درک يول گؤستريجي چيراغا باخدي. قيرميزي چيراق يانان کيمي ماشين‌لار دايانديلار؛ تئز خيياوانين اورتاسينا گليب الينده توتدوغو نرگيز گوٍللريني يوخاري قالديريب، ماشين‌لارين آراسيندا اويان-بويانا بورولارکن اوجادان سسلندي: «نرگيز، آي نرگيز گوٍلوٍ»
گوٍللري ائله يوخاري‌دا ساخلاميشديرکي بلکه هر يئردن گوروٍنسوٍن. گوٍللر آغ آپپاغ و ائله‌جه‌ده طراوتلي ايديلر. بويوٍک، قره بير ماشينين يانيندا اوجادان سسلندي: «نرگيز گوٍلوٍدوٍر آغا، نرگيز»
رولون آرخاسيندا ايله‌شن کيشي‌يه باخارکن دئدي: «آغا گوٍل ايسته‌ييرسينيز؟»
کيشي ماشينين شوٍشه‌سيني يوخاري قالديريب، دؤندوٍ يانيندا اوتوران آداملا صؤحبتينه داوام ائتدي. قارا ماشينين قاباغيندان اؤتوٍب، رولونون آرخاسيندا گنج بير قادين اوتورموش خيردا بير ماشينين يانينا گئتدي.
«خانيم نرگيز گوٍلوٍ ايسته‌ميرسينيز؟»
قادين گوٍللره باخدي.
«گوٍللر تزه‌دير خانيم»
گوٍللرين ايچيندن خيردا بير دسته آييريب قادينا وئردي. قادين گوٍللري آليب اييله‌دي.
«عطيرلي‌دي خانيم»
قادين گوٍله-گوٍله گوٍللري يانينداکي بوش صندلين اوٍستوٍنه قويدو.
«آهاي نرگيز نه اوٍچوٍن گوٍلوٍرسن؟»
نرگيز، پيه‌ده يونجالارين اوٍزه‌رينده، ديزلري اوٍسته چؤکوب اينه‌يي ساغيردي.
– «عابباس سن سن؟»
– «هه»
نرگيز سوٍت دولچاسيني گؤتوٍروٍب گلدي قاپينين يانيندا داياندي.
– «ائله بيل بوغازدير»
– «دوٍز دئييرسن؟»
– «اهه بلي»
گوٍنش پارلاق شوٍعالاري ايله کندين اورتاسينداکي مئيدانليغي اوخشاييردي. کيشي‌لر قافخانانين قاباغيندا چومبه‌لن ايله‌شميشديلر.
«ياز يارييا چاتيبدير هله‌ده ياغيشدان خبر- ائتر يوخدور کالباي حئيدر. دئييرم اير بئله گئتسه بو ايلده دئملريميز ياناجاقدير.»
کالباي حئيدر چوبوغونون کوٍلوٍنوٍ بوشالداراق گويه باخيب دئدي: «بلکه ياغدي…»
خيردا بير قيز اونونلا اوٍز به اوٍز دايانيب گوزلريني گوٍللره زيلله‌ميشدير. اونون باشينين توٍکلري قاپ-قارا شوه کيمي ايدير.
«بو گوٍللردن بيريني منه وئريرسن؟»
اونون قوجاغيندا خيرداجا بير گلينجک وارايدي. سانکي قيزين قوجاغيندا گلينجک يوخلاميشدير.
«کئچ گئت اويانا گوروٍم آ…»
قيزجيغاز ائله‌جه دايانيب گوٍللره باخيردي.
«آتا، آي آتا منيم اوٍچوٍن بير گلينجک آلارسان؟»
روٍبابه ديزلريني قوجاقلاييب ائيواندا اوتورموشدو.
کيشي گوٍللردن بير بوتاسيني آييريب دئدي:
«آلا»
قيزجيغاز گوٍلوٍ آليب گوٍلوٍمسه‌دي. ماشينلار دايانديلار.
«نرگيز، آي نرگيز گوٍلوٍ»
ماشينلارين آراسيندا فيرلانيب اويان-بويانا گئديردي.
«نرگيز گوٍلوٍ…»
گؤزلرينه گوٍنش گؤزلوٍيوٍ تاخميش بير کيشي ماشيني‌نين ايچيندن اونو چاغيردي:
«آهاي گول ساتان»
«هه بلي»
«گوٍللري نئچه دئييرسن؟»
«قابيللي دئييل آغا، هر نئچه سئويرسينيز وئرين آغا»
کيشي جيبيندن پول آختاريردي.
«گوزل عطيري وار آغا»
ياشيل چيراق ياندي. ماشينلار يوللاندي. کيشي تله‌سيک جيبيندن بير اوووج خيردا پول چيخارديب، اونون آچيلميش اووجونا توکدوٍ، گوٍللري آليب يوللاندي. الينده، عطيري، تزه سنگک چوره‌يي توتموش بير قادين اونلارين يانيندان اوتوٍب گئتدي. تزه چوره‌يين عطريني دويان کيمي اوٍره‌يي آخدي. آريق قره بنيز، قوووق ساتان بير اوغلان اونا ساري گلدي.
کيشي گويه يوٍکسه‌ليب، اويان-بويان يئلله‌نن سالخيما اوخشار آل-الوان قوووق‌لارا باخدي. نازيک بير ايپين بير باشي قوووق‌لارا دوٍيوٍنله‌نيب بير باشي ايسه اوغلانين الينده ايدي. کيشي گوٍلدوٍ. «عمي ايش-گوٍج نئجه‌دير؟» – دئيه اوغلان سوروشدو.
«آللاه روٍزوٍ وئرندير»
«گوٍللره بير آز سو سپ اولوٍشگه‌ييرلر» – اوغلان دئدي.
کيشي گوٍللره باخدي. اونلار گوٍنوٍن آلتيندا قالديقلاريندان اوولکي طراوتلريني ايتيرميشديلر.
«گرک قويموياسان سولالار»
گويوٍن اوٍزوٍ دوم-دورو ايدي. لاپ اوزاق‌لاردا بولوت تيکه‌لري داغلارا کؤلگه سالميشديلار. اؤز-اؤزوٍنه فيکيرلشدي:
«اير هاوا بئله گئتسه، بو ايلده دئملريميز يانار»
اؤز-اؤزوٍنه دئدي:
«کاش ياغا.»
«نرگيز، بورا باخ گور نئجه ياغير! ائله بيل آللاه بيزه بالام دئييب. گومان ائديرم بو ايل حاصيليميز ياخشي اولار.»
ياغيش بوٍتوٍن اوٍستوٍ-باشيني ايسلاتميشدير. آنجاق او ائله‌جه‌ده ياغيشين آلتيندا دايانميشدي.
«اوردا نييه دايانيبسان کيشي؟ سويوق دير ها»
ياغيش ناريندان آنجاق چوخ ايتي ياغيردي. الينده‌کي بئلي يئره سانجيب، اللري سيلکه‌رک دئدي:
«اير بو ايل حاصيليميز ياخشي اولسا، داي سيزين يانيزدا قاللام. شه‌هري هئچده سئوميرم شه‌هر آدامي ديغلادير»
«اؤز-اؤزوٍنه نه دئييرسن؟» – دئيه اوغلان سوروشدو
«دئييرم کي کاش بو ايل دويونجا ياغيش ياغايدي»
«ياغيشي نئينيرسن؟»
«ياغيش آللاهين برکتي‌دير»
«من ايسته‌ميرم ياغيش ياغا»
«سن آللاهين برکتيني سئوميرسن؟»
«هانکي برکت؟ ياغيش ياغاندا بوٍتوٍن وار-يوخوموز سو آلير»
«دئمه‌لي بس سن ايسته‌ميرسن ياغيش ياغا؟»
«قوي جهننم اولسون ياغيشي. دينسيز ياغاندا، هامي گئديب تپيلير ائوينه بيزيمده ايش-گوٍجوٍموٍزوٍ کاساتلايير. آللاه ائله‌سين هميشه گوٍن چيخسين.»
«کوٍفر-ناسازا دانيشما اوغلان! ياغيش ياغماسا اولار به‌يم؟ آللاهين ايشلرينين هئچ بيريسي حئساب-کيتابسيز دئييل. ياغيش ياغماسا هامي آجيندان اؤلر.»
«هئچ بئله يوٍز ايلده ياغماسين.»
کيشي دايانديغي يئرده دبريلدي.
«اير جوما گوٍنلري گوٍن چيخسا پارکدا قييامت اولار. اوندا منده قوووقلاريمين هاميسيني ساتارام، آنجاق آللاه گورستمه‌سين کي ياغيش ياغا…»
الينده‌کي ايپي بوشالديب قوووقلاري هاوادا يئلله‌درکن سسله‌ندي
«قوووقدور…»
خيياوانين او طرفيندن بير نفر قيزينان بير گنج اوغلان گلديلر.
قيز گوٍللري گورن کيمي دئدي:
«منيم اوٍچوٍن گوٍل آلميرسان؟»
کيشي اونا ساري گئتدي.
«گوٍللريوين تازاسيندان بير دسته وئر منه»
قيز دايانارکن قارا گوزلريني گوٍللره زيلله‌ميشدي. اونون باشيندا گوٍللوٍ، گوزل بير يايليق وارايدي. گوٍللري قيزا وئردي.
«نرگيز نه اولوبدور. نه اوٍچوٍن منه بئله باخيرسان؟»
نرگيز قارا گؤزلريني اوندان آييرير، اييليب پامادور سبديني بوستاندان قالديريب چيينينه قويدو.
«اوهوي نرگيز سنينله‌يم ها»
نرگيز گؤزوٍنوٍن آلتي ايلا اونا باخيب گوٍلدوٍ.
«منيم اوٍچوٍن قيرميزي گوٍللوٍ بير دون آلارسان…؟»
فيکيرلشدي:
«اير شانسيميز گتيرسه بو ايل دوٍز-عمللي بير ياغيش ياغسا، اوندا اونادا گوٍللوٍ چيت بير دون آلارام»
بير دانا سيغار آليشديريب جوبون قيراغيندا اوتوردو. جوبونان آخان قارا لئهلي سو، پورتاقال و باشقا مئيوه‌لرين ازييي ايله دولو ايدي.
فيکيرلشدي:
«اير بو سو بيزيم کندين يانيب واغامناميش زمي‌لري‌نين يانيندان کئچسه‌يدي بوغدالار ديريله‌ردي…»
الينده‌کي گوٍللره باخدي. گوٍنشين آلتيندا ياواش-ياواش گوٍللر اولوٍشگه‌ييرديلر. برک بير يئل اسه‌رک توز-تورپاغي گويه قالديردي. داغلارا باخدي.
«ائله بيل ياغير»
الينده‌کي سيغارا درين بير قوللاب ووروب کئچدي خيياوانين او تايينا.
«نرگيز، آي نرگيز گوٍلوٍ»

یک پاسخ

  1. یازیچی باجاریقلی قلمی‌ایله بوتون گؤزل‌لیکلری شهرله کندین قووشاجاغیندا بوتون نرگیز آدلی آل الوان گئییملی قیز گلین‌لرین ال‌لرینده نرگیز گول‌لری سرگی‌سینده نمایشه قویوبدور. اوخویوب لذت آپارانلارا آلقیشلار اولسون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4