mugan oglu
قارداش
بختیار موغان‌اوغلو

 احتیاط ایگیدین یاراشیقی‌دیر-

چوخدور بو دونیانین تله‌سی قارداش!

اینان کی اویونباز اوغرو یول کسن-

یامان چوخالیبدیر ائله‌سی قارداش!

چوخلاری دانیشیر یورولمور انگی،

قوزو جاناوارا باسیر اوزنگی،

سینه‌سینه  دؤین شیری،پلنگی،

 آلدادیر چؤللرین دله‌سی قارداش!

تولکو سورو چکیب داغا آپاریر،

دوه‌نی خیخیردیب باغا آپاریر،

نؤکرین موزدونو آغا آپاریر،

آرتیر یازیقلارین شله‌سی قارداش!

دورنا قاناد چالیر بولاغا چاتمیر،

آت دؤرد نالا قاچیر اولاغا چاتمیر،

ائله قیشقیریرسان  قولاغا چاتمیر،

“موغان اوغلو” یانیر بئله‌سی قارداش!