LEAD Technologies Inc. V1.01
وطنيم‌ منيم‌/
هاشم ترلان

   سلام‌ اودلار يوردو، سلام‌ اي‌ وطن‌,

 تابيم‌ توانيم‌ منيم,‌ وطنيم‌ منيم‌!

 قوينوندا اولماسامدا, آيري‌ دوشسمده‌ سندن‌

 سنينله‌ ياشايان‌، سنينله‌ دوران‌

 اؤز اوغلونام‌ من‌, ترلانام‌ من‌.

 *

بيليرم‌ مندن‌ گيله‌يين‌ده‌ وار،

 بيليرم‌ بوينومدا امه‌يين‌ده‌ وار.

 دئييرسن‌ يقين‌:

 – گوللره‌ شعیر يازان‌،

 ائللره‌ شعیر يازان‌ ترلانيم‌ منيم‌

يادينا سالمير مني‌,

بلكه‌ اوجوز توتور دوغما وطني‌.

بودور جوابيم‌ منيم‌،وطنيم‌ منيم‌!:

-دئييرم‌ باشيندا اسمه‌سين‌ كولك‌،

 نه‌ يازيم‌ آدينا ياراشسين‌ آنا؟!

 هر شعريم‌ گونشين‌ شعالاري‌ تك‌،

 او آغ‌ ساچلارينا داراشسين‌ آنا!

 يازيم‌ گونشسن‌؟

           نورلوسان‌ اوندان‌.

 يازيم‌ آتشسن‌؟

             اودلوسان‌ اوندان‌.

 يازيم‌ آنالار آناسيسان‌ سن؟

            اولوسان‌ اوندان‌.

 نه‌ يازيم‌ وطن‌؟

 دئييرم‌ بير نغمه‌ بسته‌له‌ييم‌ من‌،

 سسيم‌ پروازلانيب‌، مين‌ بير داغ‌ آشسين‌

 دوغروسو، دونيايا سيغمايان‌ اوره‌ك‌

 بو عاجیز قلمه‌ نئجه‌ سيغيشسين‌.

 *

دئييرم‌، گل‌ توتوم‌ اتك‌لريندن‌،

 آديمي‌ آدينلا تانيسين‌ جاهان‌.

 بوآندا قلميم‌، سسله‌نيركي‌ سن‌،

 نه‌ صمد وورغون‌سان‌، نه‌ده‌ سليمان‌.

*

 وصفيني‌ ائتمه‌يه‌ آذربايجانين‌،

 هاردادير او قدرت‌، هاردادير وطن‌.

 منه‌ بير جاهاندير سنين‌ هر آنين‌،

 فقط‌ ائللريندير قلبيمدن‌ اؤتن‌.

*

 يوخ‌!آنا، يوخ‌! وطن‌، يوخ‌! عزيز ديار.

 صنعت‌ عالمينده‌ بو دئييل‌ پئشم‌.

 قورخورام‌ كلاميم‌، اولسون‌ ناغيلوار،

 شعر ایلهاميما توخونسون‌ تئشم‌.

*

 گول‌ نه‌دير، تئل‌ نه‌دير، بوتون‌ دونيانين‌،

 گوللري‌، تئل‌لري‌، بير تئلين‌ اولماز.

 باش‌-باشا چاتسادا بوتون‌ گؤزل‌ليك‌،

 خزرين‌، سهندين‌، گؤي‌ گؤلون‌ اولماز.

*

 گولزاردا ائتمه‌ديم‌، هر گوله‌ تمكين‌.

 سئومه‌ييب‌، بويونا چلنگ‌ هؤرمه‌ديم‌،

 حتي‌ قوس‌ و قزح‌، او يئددي‌ رنگين‌،

 سنين‌ صورتينه‌ روا گؤرمه‌ديم‌.

*

 شانيندا يازماغا سنين‌ اي‌ وطن‌،

 قلمي‌، ایلهامي‌، بير عمان‌ گره‌ك‌.

 او قدر عزيزسن‌، اوجاسان‌ كي‌ سن‌،

 وصفيني‌ ائتمه‌يه‌ سليمان‌ گره‌ك‌.

*

 فقط‌ بير بويا وار، دامارلاريمدا،

 عؤمرومله‌ياناشي‌ دوغولوب‌ ائكيز.

 اونونلا شعريمده‌، اعتباريمدا

 حيات‌ يوللاريندا بوي‌ آتميشيق‌ بيز.

*

 او دا اؤز قانيمدير، بدنيمده‌كي‌،

 اوندان‌ گرانبها نه‌ييم‌ وار آنا!

 منيم‌ قلميمين‌، جوهري‌دير او،

 اونسوز من‌ نه‌ يازيم‌ آذربايجانا.

*

 ايندي‌ سنگرده‌يم‌، كئچيب‌ جانيمدان‌،

 انقلاب‌ اوغلويام‌، اوزوم‌ ده‌ آغ‌دير.

 صاباح‌ يارالانسام‌ ، آخان‌ قانيمدان‌

 داستانيم‌ آدينا يازيلاجاقدير.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4