ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4

شعرلر
قنداب (آذربایجان جمهوریسی)

۱٫ شعر قیز

گول، گول آچسین دوداقلاریندا،
سئوینج قایناسین گؤزلری‌نین
بولاقلاریندا،
سن گولدوکجه گؤزللشیرسن!
یئللرله اوینادیقجا،
حیاتین سیررلری آچیلیر-
ایپک ساچلاری‌نین بوروقلاریندا!
شعیر باخیشلاریندان
سوزولور گونشین ساری تئل‌لری
بیر دامجی سو – بیر داملا شئح
آغلایاندا یاناقلاریندا،
آنجاق سن حوزونلنیرسن!
دوپ دورو سو کیمی‌سن،
اوره‌یین اوخونور گؤزلریندن!
صافلیغین دونیانین باغرین دلیر!
آچ، ملک قوللارینی عالمه،
دونیایا گؤزللیک سندن گلیر.

۲٫ آدسیز شعر

اؤلوم قورخوتمور منی
سنی آختاریرکن،
کؤنلومون صاباحسیز کوچه‌لرینده.
ان آغیر آیریلیغی یاشامیشام
گؤزلرینه باخارکن!

تنهالیق سیخمادی قلبیمی
سنسیزلیک سیخدیغی قده‌ر!
سئوگی بولودلاریندا
چاتیر-چاتیر یانمیشام
ایلدیریم‌لار چاخارکن!

مندن سنی سن آلدین،
روحون یئتمیر هارایا.
یالنیزلیق‌لا دوست ایدیم،
اؤلمون گیردی آرایا
گؤزلریمه آینا سولار
دوم‌دورو آخارکن!

اؤلوم آیریلیغین
ان یوخسول اولانی‌دیر؛
من‌سه سنی اؤلمه‌دن
مزارا گؤندریرم،
اریین شام
اللریمی یاخارکن!

۳٫ بیر ساعات وار…

بیر ساعات وار آرامیزدا…
بیر ده، گؤزلری آچیق
گؤزل بیر خیال قورسام،
یا، گئرچگی اونوتسام!

بیر ساعات وار آرامیزدا…
من، یالنیز دئییلم کی،
من ده، سنه ساریلسام!
یالنیزلیق سنه مخصوص آللاهیم!

بیر ساعات وار آرامیزدا…
بیری منی اویاتسا،
یا دا، بو ساعات یاتسا،
من ائله اویاق قالسام!

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *