یالنیزلیق
حسین مصری

اوزون بیرخییاوان‌دیر یالنیزلیق
اوره‌ییمین سینیق نوتالاریندان
گؤزلریمین
بیرجه داملا یاش حسرتی‌نین
آستاناسیندان –
باشلانیر .
گونوزلرینی دئمه‌رم، یوخ!
گئجه‌لری چوخ گؤزه‌ل اولور یالنیزلی غین.
ال –اله
قول – قولا
دولاشیریق
من وآرخامجا –
آسفالت اوزه‌رینده سورونن
جانسیز
و بویاسیز کؤلگه‌م.
گلسن؛ دئمه‌رم یوخ!
گولوم گلمه !
گئتسن دئمه‌رم
گولوم گئتمه !
یادیرغاییب داها
قولاغلاریم
گلیش – گئدیش سؤزجوکلری‌نین
باش حرفی‌نین
تکرار-تکرار
اؤزلمینه.
یئنه باخیرام
پنجره آرخاسیندان
یاغیشا دؤنور بولوتلار
اوتاییندا پنجره‌نین .
ال قووزاییرام
کیمسه‌یه بلکه
اللریم آسیلی قالیر گؤیده
الویداع آنلارینی
فلش‌بک چکیر گؤزلریمه .