sayyad ziyadpoor
تک‌‌لیک
صیاد زیادپور

قفسده تک قوشو دیندیرن اولمور،
گوزگوده اؤزونه باخیب دانیشیر.
تای توشلارین گئری دؤندرن اولمور،
قوشلار جرگه‌سیندن چیخیب دانیشیر.

سیخیلیر نئیله‌سین قفس داردی دار،
قفسه سیغمایان آرزیلاری وار،
ال چاتماز اولدوقجا همن آرزیلار،
گؤزوندن اوره‌یین سیخیب دانیشیر.

قوشون قوش دردی وار ،آدامین آدام،
اونو قفس سیخیر منی دار اودام،
تک‌لیک حال‌هاواسین قویمور اونودام،
هئی منی یاندیریب، یاخیب دانیشیر.

«صیاد»ام عؤمورلوک قالدی یادیمدا،
طالعین قولویموش قوش دا، آدام دا،
قوشو دوشونرکن کیچیک اودامدا،
دویغولار گؤزومدن آخیب دانیشیر.