Home / شعر / قیسا شعرلر (۱۶) / فریبا مرتضایی

قیسا شعرلر (۱۶) / فریبا مرتضایی

fariba mortazai
قیسا شعرلر (۱۶)
فریبا مرتضایی

 

 (۱)
سن
من
بیز اولمایاندا
اوره‌ییم شاخیر
بولود تک‌هارایلانیر
دولو- دولو گؤزلریم
یاغیشدان اؤنجه آغلاییر!

(۲)
توتولان اوره‌ییمین
بندی سنسن
قورخورام…
آماندی گؤزلریمه باخما!
بو گؤلده
بوغولارسان.

(۳)
گل یازیمین قاپسین چال
اوشاق اوره‌ییمی‌دیندیر
یئنی‌دن منی شعره
منی سازا
منی سؤزه قایتار!
دؤن منه ساری
سنسیز؛
السیز
آیاقسیز
دیلسیزم!

(۴)
آندا نه گره‌ک
ائله بئله گل
سئومک
ائله بئله اولور

(۵)
ایل‌لردیر
اینسانلاری آرخادان گؤرورم
اوزلرین اونوتموشام
گئدیرم
کیم آغلاییر
کیم گولور
بیلمیرم

(۶)
آی منیم اوشاقلیغیم
هایاندا قالمیسان
آغ گؤنلریم
ساچیما دوشوب
قاراسی بخت آیناما
باخیب باخیب آغلامیشام
دیزلریم
گلمیر سنه
سن گل بیزه
باشینا دؤنوم
داریخمیشام

(۷)
بو گون سالام وئردیکلریم
صاباح؛
اوز چئویردیلر مندن
دایان
سن ده هر کسلشمه

(۸)
سای منی
سنسیز گونلرین ساییسی
اؤلدورور منی

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *