آنلیمین یازیسی
معصوم جبارپور
…
بیر سویوق دوشونجه جانینا غریبه بیر آلوو سالیر
بیر یارادیش یئنه قیدیقلاییر کندیسین
هی ی ی ی
دور
ال ساخلا
بئینیمین ازیلمه‌ییندن دئوریم دئییشیلیر!
هی
دایان
بیزی ایکی‌لی یارات…
بیر قهقهه سسی فلکی تیتره‌دیر
ساققاللی بیر کیشی بیر ماسا آرخاسیندا اوتوروب یازیلار جیزیر
آنلیمین یازیسینی!
اینانیرمیسینیز؟
…
یاغیش یاغیر
سئرچه‌لر اوره‌ییمین بیر بوجاغینا سیغینیب_
یازیق بوزوشوک سئرچه‌لر
منیم یانمیش ۳۰ … یاشلاریم کیمی!
کوچه و یاغیش ایزلری
یئرین اورک بولانماسینی گؤستریر
یازیر
یئنه بوتون یالنیزلیق‌لار
قایغی‌لار
یوکله‌نیر یورقون اوموزلاریما!
اؤلوم داماغیما سوزولونجه تامسینیرام شیرین آجیلیغینی
آغلار گولر آیین ایلک گونودور
بیریسی
پالچیق گزیر منی یونماغا
توپراق اوز چئویریر _
هاوالانیر قاچیر کدرلری یازیلاری اوخویونجا!
اوت آلوولارین بوغور _
اؤلور
یئل آرخاسینا باخمادان ساققاللی کیشینی _
بوراخیب قاچیر
اوزاقلاشیر!
…
گؤی سسلندی
بیر قیزجیغازین یاشاییشی سؤیلندی
بولوت‌لار دؤیوشونجه
تبریزه_
ایلین ایلک گونو
فاجیعه یاغدی
***
دونیانین یورقون دوشموش خارابالیغیندان_
بویلاندیم بیر اوره‌یه
بیلیرسنمی:
بویوک بیر نیسگیلین نیسگیللی‌سی‌یم
تنهالیغیمی داشیییرام_
دونیانین خارابالیغیندا
بلکه ده بیر خارابایا چئوریلمیشم
چؤکدو آی ایشیغی گؤوده‌مه
و
بیر بایقوش قانادلاندی مندن
ایللردی
گونش بوغولوب ایچیمده
و
گؤزلریمده سوزولمور گونش ساچلاری
بوتون یاشاییش قارا!
نه اولور
گل منده بات
مندن دوغول!
نه جیغال تانری‌دیر…
گل قول بویون اولاق
بوتون یالنیزلیقلاریمیزی ماهنا ائدرکن.
اللریم آلوولاییر
دانیش
قادینلیغیم بوشالسین لیریک سؤزجوکلرینله!
سوزولسون ارککلییینه_
چوخ چتین دئییل
آخی
کیشی‌سن‌می‌سن
شعرلریم دوغولمادان
سن
دودااقلارینلا
سؤزجوک تؤروملارین یاغدیر اوره‌ییمه
اللریمی توت
بیر دیوان بیتی‌یی دوغولسون
گل
گئتمه‌یینین قوخوسو منی بوغور
گل
باغیریراوره‌ییم
باغیریر
اوره‌ییم گون باتان چاغی گؤزومون شئحلی مئوسیمینی …
***
ساققال کیشی‌نین آز قالیر سارایی ییخیلا
توپراقلا اوت کؤچوب گئدیرلر
فلک گؤزلرین دولدورب
بیر پاتلاییشی بئکله‌ییر
بیر یاشیل گؤزلو قیز بولودلارین آرخاسیندان
ساققاللی کیشی‌یه یالواریر
سیزیلتی‌لاری شه‌هری آغلادیر
***
زامان بیتمه‌سین دئیه
بوتون یوللارین بویونجا
سس‌سیز بیر چؤلده
یاشاییشین ماهنیسین سیزیلداییر قیزجیغاز
تانری دونوخور
باخیر
یاشیل گؤزلر شئحلی هاواسیله سسلنیر
سنینله داوام ائده‌جه‌یم فلکین اویونونو
سونوندا اوتاناجاقسان
ایکی ال آیریلینجا
یئنه ساققاللی بیر کیشی
آجیماسیز بیر اورکله
آغلار گولر آیین ایلک گونونده
بیر سیخیم قالمیش چوروموش پاپراقلاردان
بیر کؤرپه یارالدیر
اوره‌یی ایلمه ایلمه سؤکولور
میصراع‌لار یاسا باتیر
میضراب‌لار نوتلاری قارقاییر
بیر کیشی‌نین گئجه هوسیله
بیر قیزجیغاز
سورمه‌لی گؤزلریله
دوداقلارینا
کدرله دولو بیر بویا سورور
صاباح..
و بیر موتلو گؤز آیدین
بیلیرسنمی:
بیر گون یاشیل گؤزلو قیزجیغاز کپنک‌له‌شه‌جک
قیسساجیق بیر عؤمور،
نه موتلو منه
گؤزلرین آیدین اولسون
ایندیسه
گئت
یئددینجی گؤیونده
قایغیلی بیر قیز یاراتدیغین اوچون دئنن:
“فتبارک الله احسن الخالقین”
