gokyuzu_bulut_gunes_2
سنی اونوتسام
نصرت کسمنلی

من سنی اونودا بیلمیرم، آخی
اونوتسام، نه لری اونودام گرک!
گؤیلره باخمیشیق آیلی گئجه‌ده
اونوتسام، گؤیلری اونودام گرک!

دنیزی اونودوم، یا دالغالاری؟
خاطیرن یادیمدان چیخایدی باری
پاییزدا خزانی، قیشداسا قاری
باهاردا گوللری اونودام گرک!

دئ نئجه اونودوم من سنی نئجه؟
سئوگی دورنا دئییل، پاییزدا کؤچه
یوخوما گلیرسن منیم هر گئجه
آیلاری، ایللری اونودام گرک!

سنین خیالیندیر حسرتله باخان
آدیندیر هر ساعات قارشیما چیخان
قاریشیب شکلینه گؤزومدن آخان
یاغیشی، سئللری اونودام گرک!

سینه‌مده پشیمان اوره‌گیم قالدی
اوچدون اللریمده له‌لگیم قالدی
نه لری ایتیریب، باخ نه‌ییم قالدی؟
نه لری، نه لری اونودام گرک!