fariba mortazayi
قیسا شعرلر(9)
فریبا مرتضایی

(1)
یارادان الله‌دیر،
اؤلدورن سن؛
آی بالا، سن کیمسن؟!

 (2)
بیزی سئویرم،
بیزده سن وارسان.

(3)
های قوپوبدور من اؤلموشم
دوغرودور، من اؤلموشم؛
بوراخین
آداملیغیم دورسون ایاق اوسته!

(4)
گؤزلريمدن آخان داملالار –
سوزوب ياناغيني يالار؛
ديليم كوسوب بوغازيما قاچار؛
يوخسان
بو هاراي هارايا چاتار؟،
كيم بو ديلي ديله توتار،
كيم باريشديرار؟!

(5)
سون باهارين يارپاقدير
گلن گئدن آياقلايير؛
خوشونا گئدير
خيشيلدادير؛
نه آپاران وار، نه دينديرن،
يازيق اوره‌ييم
تك باشينا ازيلير!

(6)
سن اولاندا باشيم سنه دولانير،
سن اولماياندا
مئيداندا توپ اولور!
بيري گلسين
سنه ساري شوتلاسين،
نه اولور!

(7)
سون باهاری سئویرم،
آمما قیش گلسین!
قیشدا، بورنومون اوجو بئله قیزارار –
اوتانارام!
آمما سندن نه گیزلین،
بو صحنه‌نی یاشاماق ایسته‌رم؛
سنینله قارلارین اوستونده یئرییم،
یاواش-یاواش، ال-اله
بیردن دؤنوب اوزومه باخاسان،
من اوتانام، سن گوله‌سن؛
سونرا بورنومون اوجون توتوب سیخاسان؛
اوره‌ییم دؤزمور…
گل ائویمیزه دؤنک، سن دونارسان!
بو اَن گؤزل دویغو،
اَن گؤزل ائوه ساری دؤنوشدور…

3 پاسخ

  1. حؤرمتلی شاعیر قلمداشیم فریبا خانیم مرتضائی نین شعرلری اوره یه یاتاندیر، بونادا سؤز یوخ امّا،بیرینجی شعرینی اوخویارکن گؤزلریم سولاندی.

  2. چوخ گؤزل شعر لر هر زامانکی کیمین دویا دویا اوخودوم خانمی مرتضایی اللریز آغریماسین .

    های قوپوبدور من اؤلموشم
    دوغرودور، من اؤلموشم؛
    بوراخین
    آداملیغیم دورسون ایاق اوسته!

  3. بو شئعیری بیر فیلم کیمی سئیر ائدیم نه قده ر گؤزل دویغو وار اولون عزیز و مهربان خانیم مرتضایی

    سون باهاری سئویرم،
    آمما قیش گلسین!
    قیشدا، بورنومون اوجو بئله قیزارار –
    اوتانارام!
    آمما سندن نه گیزلین،
    بو صحنه‌نی یاشاماق ایسته‌رم؛
    سنینله قارلارین اوستونده یئرییم،
    یاواش-یاواش، ال-اله
    بیردن دؤنوب اوزومه باخاسان،
    من اوتانام، سن گوله‌سن؛
    سونرا بورنومون اوجون توتوب سیخاسان؛
    اوره‌ییم دؤزمور…
    گل ائویمیزه دؤنک، سن دونارسان!
    بو اَن گؤزل دویغو،
    اَن گؤزل ائوه ساری دؤنوشدور…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4