sharak
آی اوغلان!
محمدحسین طهماسب‌پور(میرزه شهرک)

بی‌شیله و بی‌پیله ائدیم شعریمی آغاز،
ـ طرد اولماليدي اولسا هنر اهلي دغلباز؛
ائل خاطرینه اولماسا گر سازیله آواز
وئرمزله بیر عابباسی او آوازه، آی اوغلان!
قاتما باشيوي تک سازا، آوازه، آی اوغلان!

بیدار ائله‌مزسه هنرین باشلارا بورک‌دور،
اول تار و قاوال ورز و وبالدیر، سنه یوک‌دور؛
خلقین حیاتیندا هنرین نقشی بؤیوکدور،
جان ائیله عطا ذوقيله جانبازه آی اوغلان!
قاتما باشيوي تک سازا، آوازه، آی اوغلان!

سؤزلر سؤز اولا، بیرده چالان شوریله چالسا،
دیل‌دن چیخیب آواز یولون دل‌لره سالسا،
اودلار اوره‌یی، اوولار اونو ائل سئوه‌ر اولسا،
تایسان بو شکار ائتمه‌ده شهبازه آی اوغلان!
قاتما باشيوي تک سازا، آوازه آی اوغلان!

هر بزّازین اؤز آرشینی واردی، بئزی واردی،
هر مجلسین اؤز صحبتی واردی، سؤزو واردی،
چال ـ اویناماغین‌دا دادی واردی، دوزو واردی،
یونگوللوک ائدیب، اویناما هر سازه آی اوغلان!
قاتما باشيوي تک سازا، آوازه، آی اوغلان!

تکفیر چوماغیندان قورو اؤز باشینی، قوی قاچ!
چال زاهد تزویرکارین اووجونو چال آچ!
فاطما خالا، زینب ننه‌نین کؤنلونو بیر آچ!
هی چالما سازین شاپورا، شهنازه آی اوغلان!
قاتما باشيوي تک سازا، آوازه، آی اوغلان!

جنگی چالیسان شوریله، چال، جانلاری آل آل!
صلحین سرودون دیللره سال، دل‌لره چال، سال!
قویما مازاتا بیلدیگیوی، ملّت اوچون چال!
یوخ حوصله‌میز چوخ بو قده‌ر نازه، آی اوغلان!
قاتما باشيوي تک سازا، آوازه، آی اوغلان!

آز کبر و غروریله باشین گؤیلره قالخیز،
یئللندیسه بورنون قالاجاقسان بالا یالقیز؛
قولتوقلاریوین آلتینا یئرلشمه‌سه قارپیز
قازلانما قانادسیز هله پروازه‌ آی اوغلان!
یوخ حوصله‌میز چوخ بو قده‌ر نازه، آی اوغلان!

ائندیر او خیال مرکبی گؤیدن یئره ائندیر!
توپراقدادیر اول گزدیگین انسان، اونو دیندیر!
یوخدورسا هنرده حرکت، تخدیر ائدندیر،
آت تریاکی، چک گوشه‌ده خمیازه آی اوغلان!
یوخ حوصله‌میز چوخ بو قده‌ر نازه، آی اوغلان!

هر بیر ایینه کورک، باشا بؤرک گئییلمز،
هر بیر خؤره‌ک هر یئرده صفاایله یئییلمز،
هر کور کیشی‌نین اوغلونا کور اوغلو دئییلمز،
گل زولفعلی آد قویما باشی دازه، آی اوغلان!
یوخ حوصله‌میز چوخ بو قده‌ر نازه، آی اوغلان!

هر جیزماقارا یازماغا گر وئرسه‌له خلعت
«آمیرزانی»دا سال حسابا ـ بیر پیتی بیر ات؛
یوخسا، دیلینی چک توته‌یین، زیرنانی گيزلت،
گئت‌سن‌ده قوشول مهوشه، مهنازه آی اوغلان!
یوخ حوصله‌میز چوخ بو قده‌ر نازه، آی اوغلان!
1364

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4