shahrak
حسن کلیدساز گلیب
محمدحسین طهماسب‌پور(میرزه شهرک)

قیش گئدیب یای, یاز گلیب

گؤله اؤردک قاز گلیب

قیفیل‌لاری آشماغا

حسن کلیدساز گلیب.

×

حسن آقا سوستالما

اوراق زاد اله آلما

کلیدین دسته‌سینی

الیندن یئره سالما!

×

عزیزینم قاچ حسن،

تلس حسن، قاچ حسن

دیلیمیز باغلی قالیب

کلید گتیر آچ حسن!

×

عزیزینم گؤتورمه

داشی یئکه گؤتورمه

محکم دوت سال بوینووا

کلیدلری ایتیرمه!

×

حسن وار آ حسن وار

باریشان وار، کوسن وار

یول چینقیللی، داشلیدی

حرامی، یول کسن وار!

×

 ناامید اولما امیددن

میغایات اول کلید‌دن

ائللر حمایت ائده‌ر

دار گونونده ایگید‌دن!

×

امید وئردین ایرانا

مژده قوجا، جاوانا

محاصره‌نی سیندیر

بیر کلید سال زندانا!

×

کؤرپو کئچمز اولماسین

شربت ایچمز اولماسین

انشالله کی هئچ وده

قیفیل آچمز اولماسین!

×

آز بیزه گل گل ائیله

آیاق گؤتور ال ائیله

وعده‌لری ائشیتدیک

رأی وئردیک عمل ائیله!

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4