بیزیم آرواد
روزبه صمدی (نیراوغلو)

چوخدان بوشویوبدور منی آللاه، بیزیم آرواد
چوخدان وورولوب اویناشا وآللاه بیزیم آرواد

گاه واتساپا، گاه تئلگراما، قاش گؤز آتیر بو
بیلمم کیمه هر گون نئچه یوز یول سؤز آتیر بو
تندیر کیمی‌هئی قلبیمه اوتدان کؤز آتیر بو
هر شئیدن اولوب دونیادا آگاه بیزیم آرواد
چوخدان وورولوب اویناشا وآللاه بیزیم آرواد

وورماز بو یازیق کؤنلومه باش آیدادا بیر یول
آتماز منه اونلار کیمی‌قاش آیدادا بیر یول
اؤلسمده پیشیرمز منه آش آیدادا بیر یول
یوسف کیمی‌قازمیش منه بیر چاه بیزیم آرواد
چوخدان وورولوب اویناشا وآللاه بیزیم آرواد

چوخ یول منه خاطیر، بالا کؤینک گئیینردی
هم قیرمیزی، هم گؤی آلا کؤینک گئیینردی
من ایسته دیگیم قان لالا گئیینردی
ایللردی گئیینمیر داخی راه راه بیزیم آرواد
چوخدان وورولوب اویناشا وآللاه بیزیم آرواد

ائوده بیز ایلن ایلده دئییب آیدادا گولمور
قیش فصلی جهنم، داخی یاز یایدا گولمور
بایرامدا سوسور، تویدا کی نای نای دادا گولمور
آمما گولور اینترنته قاه قاه بیزیم آرواد
چوخدان وورولوب اویناشا وآللاه بیزیم آرواد

چوخ یول گئجه‌لر صوبحه قده‌ر آج یاتیروق بیز
نعمت ده بول اولسا، شاما محتاج یاتیروق بیز
هر بیر باشا گؤردوک قویولوب تاج، یاتیروق بیز
دستور بویورور چون کی اولوب شاه بیزیم آرواد
چوخدان وورولوب اویناشا وآللاه بیزیم آرواد

وآللاه بو عمل لردن اورک زینهارا گلمیش
حتتا بو اوشاقلاردا الیندن زارا گلمیش
هاردایدوق ازلدن، ایشیمیز گؤر‌هارا گلمیش
آللاه گؤرسن کی اولار اصلاح بیزیم آرواد؟
چوخدان وورولوب اویناشا وآللاه بیزیم آرواد

اولسایدی علاجیم دده لاپ تک یاشیاردیم
گوندوز گئجه داغلاردا گئدیب داش داشیاردیم
قویسایدی اوشاقلار بونو چوخدان بوشویاردیم
چرلتدی منی دونیادا واه واه بیزیم آرواد
چوخدان وورولوب اویناشا وآللاه بیزیم آرواد

چون تئلگرام اؤلدی، دیکلیبدیر سروش ایندی
دای گؤرمیه‌جکدیر دوگوموز بیر خوروش ایندی
بیر عده‌یه پیغمبر اولوبدور کوروش ایندی
اولموش دییه‌سن شیطانا درگاه بیزیم آرواد
چوخدان وورولوب اویناشا وآللاه بیزیم آرواد

هر بیر شئیه، هر بیر ایشه عینک قویور ایندی
هر سؤز یازیلیر اوردا دئییر عین یقین‌دی
آللاهدان اوزوبدور الین ایمانی سریندی
چوخ کسلر اولموش بئله بدخواه بیزیم آرواد
چوخدان وورولوب اویناشا وآللاه بیزیم آرواد

انصاف ائلمیرسن دییه سن سنده «نیراوغلی»
گؤسترمه گیلن خلقه بوتون یوللاری باغلی
ائت خلقه اومید وئرمگیلن شعریوی یاغلی
انصافه گلیر گاهیله بی گاه بیزیم آرواد
دایم بوشامیر بیزلری وآللاه بیزیم آرواد
۲۸/اردیبهشت/۹۷